Faktus ne’e konsege sai bainhira Ministru Justisa, Tiago Amaral Sarmento, halo enkontru ho organizasaun Rede ba Rai no Komunidade Markoni, relasiona ho disputa rai iha klinika 333 nia oin.
Ministru Justisa, Tiago Amaral Sarmento hatete, iha tinan 2017, empreza no individu balun halo arendamentu ho Ministériu Justisa ba rai iha klinika 333 nia oin.
Kontratu refere, nia dehan, remata ona iha fulan Maiu tinan ne’e.
Maske halo arendamentu, maibé Ministru ne’e dehan, empreza refere la selu arendamentu ba governu.
“Empreza ne’e selu de’it fulan rua, fulan tolu, atividade la halo to’o agora, ne’ebé hamosu ona dividas hamutuk $36.000 resin, ha’u fó hatene ida ne’e par imi hatene hotu tanba ne’e ema kestiona ne’e ami haksolok tebes,” dehan Ministru iha enkontru ho Rede ba Rai no reprezentante Komunidade Markoni iha edifisiu MJ, Segunda (19/09).
Nia hatutan, gabinete Ministériu Justisa identifika ona see-see mak la selu no iha dividas sei hatan iha Ministériu Públiku no obriga sira tenke selu.
Tuir nia, faktus ida ne’e hatudu katak rai ne’e rai estadu nian. Tanba rai estadu nian mak iha tinan 2017 MJ halo kontratu arendamentu.
Nune’e, iha Maiu 2022 too ohin loron Gabinete MJ nian halo hotu ona averiguasaun no relatoriu hatama hotu ona, iha empreza hamutuk 85 lakumpri dever hodi selu arendamentu estadu nian no hamosu divida lubuk ida.
Iha parte seluk, bainhira jornalista sira halo konfirmasaun ho Inspetor Gabinete Inspesaun Auditorial (GIA), Lucas António da Costa kona-ba kestaun ne’e, nia hatete de’it katak daudauk ne’e nia parte halo hela preparasaun atu hato’o keixa ba Ministériu Públiku.
Lucas dehan, GIA nia kompetensia atu haruka ba MP emprezariu sira ne’ebé mak la selu arendamentu no sira ne’ebé balun aluga tutan rai no uma estadu la ho koñesimentu husi MJ.
“Husi kompaña empreza sira ne’e hamutuk hotu 85, maibé iha kazu ne’ebé mak ami atu hatama ba MP mak empreza sira ne’ebé mak la selu arendamentu ne’ebé ami dentidika sira hamutuk 22, ne’ebé kompostu husi kompaña nasionál no internasionál,” informa nia via telefone, Kuarta (21/09).
