Tuir komunikadu ne’ebé online INDEPENDENTE asesu katak, Projetu rezolusaun ne'e aprezenta hosi Ministru Asuntu Kombatente Libertasaun Nasionál, Gil da Costa Monteiro “Oan Soru”,
"Ho Rezolusaun ida-ne’e, Governu reafirma ninia apoiu inkondisionál ba Ministériu Asuntu Kombatentes Libertasaun Nasionál, iha implementasaun medidas hotu-hotu relasiona ho publikasaun avizu rejistu 2009 nian, tuir termu sira ne’ebé estabelese ona iha Estatutu Kombatentes Libertasaun Nasionál nian , ne’ebé aprova ona husi. Lei n. 3/2006, loron 12 fulan-abríl, altera hosi Lei n. 9/2009, loron 29 fulan-jullu, Lei n.2/2011, loron 23 fulan-marsu no Lei n.3/2024, loron 12 fulan-juñu," dehan komunidade ne'ebé Online INDEPENDENTE asesu iha Pájina PCM, Kinta (30/01).
Komunikadu ne’e haktuir, Governu iha no sei komprometidu nafatin atu garante katak prosesu tomak rejistu dadus kona-ba kombatente libertasaun nasionál nian hala’o ho forma integrál no bazeia eskluzivamente ba lei, hodi garante kombatente hotu-hotu nia direitu.
Tanba, tuir termu Estatutu Kombatentes Libertasaun Nasionál nian, karik laiha konkordánsia ho dadus ne'ebé publika ona, interesadu sira iha direitu atu aprezenta reklamasaun ho provas ne’ebé fundamentadu, individualmente, iha prazu loron 60 hahú hosi data publikasaun avizu ne’e.
Entretantu, ema ne’ebé halo deklarasaun falsu ka fó informasaun falsu, ka falsifika dokumentu relasiona ho prova militánsia iha luta libertasaun nasionál ho intensaun atu hetan direitu ne’ebé konsagra iha Estatutu Kombatente Libertasaun Nasionál, sei hetan kastigu tuir lei haruka.
