Ministru Prezidensiá Konsellu Ministru (MPKM) anúnsia inisiativa ida-ne’e ho títulu “Prezépiu ba Fulan Dame Ni’an”, ne’ebé ho objetivu atu fó prémiu ba prezépiu nasionál sira ne’ebé di’ak liu ho objetivu atu promove dame, estabilidade, laiha violénsia no unidade iha Timor-Leste.
“Kompetisaun ne’e, loke ba suku hotu-hotu iha Dili no kapitál sira hotu munisípiu ni’an, sei fó oportunidade ida ba ita-nia povu hodi hatudu sira-nia kriatividade no espresa mensajen dame nian liu husi prezépiu natál tradisionál,” Online INDEPENDENTE Sita iha Komunikadu iha Gabinete Prezidente Konsellu Ministru, Kinta (7/12).
Ho Insentiva partisipasaun ne’e hanesan jestu koletivu ida-ne’ebé defende valór fundamentál ba moris-di’ak sosiedade nian. Sei konvida suku hotu-hotu iha Dili atu partisipa iha kompetisaun ne’e. Prezépiu lima ne’ebé di’ak liu maka sei hetan prémiu ho valór osan.
Tuir komunikadu, Inisiativa ne’e abranje ba munisípiu hotu-hotu, iha ne’ebé prezépiu tolu ne’ebé di’ak liu maka sei hetan prémiu. Kompetisaun ne’e abranje de’it ba kapitál iha kada munisípiu, la inklui postu administrativu sira seluk.
Prezépiu hirak ne’e sei hetan avaliasaun bazeia ba kriatividade, orijinalidade no kapasidade atu tranzmite mensajen dame nian. Suku sira Dili nian ka kapitál sira Munisípiu nian de’it ne’ebé sei garante pás, estabilidade no laiha violénsia to’o loron 31 fulan Dezembru maka sei bele hetan prémiu, maske molok ne’e sira iha ona kualifikasaun.
Tanba inisiativa ida ne’e, la’ós de’it atu selebra festa natál, maibé mós destaka importánsia husi valór fundamentál ne’ebé kontribui atu harii sosiedade ida ne’ebé iha armonia.
“Governu fiar katak kompetisaun ida-ne’e la’ós de’it sei promove kriatividade artístika ita nia populasaun nian, liu-liu ita-nia foin sa’e sira, maibé mós sei hametin kompromisu populasaun hotu-hotu nian atu kontribui ba dame no armonia,”
Tan ne’e apela ba ema hotu-hotu atu partisipa ativa iha inisiativa ida-ne’e, hodi kontribui atu garante país ida ne’ebé unidu no hakmatek liu.
Molok ne’e, Ministru Administraun Estatal, Tomas do Rosario Cabral hateten, Primeiru Ministru deklara ona maibé MAE ho PCM sei aserta ida-ne'e oinsá bele iha komisaun ida atu bele haree bá prosesu kompetisaun ne'e.
“Ne'e ami sei deskute, Primeiru Ministru deklara tiha ona, Prezidensiá Konsellu Ministru ami sei aserta ida ne'e,” Dehan Ministru Tomas, hafoin selebra loron PNDS bá dala-10, iha CCD Merkadu Lama, Tersa (05/12).
Material harii prezépiu natál nia afirma, labele uza material mai husi li'ur, maibé material lokál, labele uza gravador ka Múzika bá dansa fali iha neeba fatin prezépiu.
“Entaun halo ida-ne'e hodi kontribui ba bu'at tolu ne'e paz, dame no kontribui ba iha rai ne'e, tanba ne'e mak hein de'it deskute para iha komisaun ida para atu haree,” Nia relata.
Purtantu, iha 01 Dezembru 2023, Primeiru-Ministru, Kay Rala Xanana Gusmão, husu ba juvendu sira iha munisípiu hot-hotu atu partisipa iha kompetisaun harii prezepiu natál ba dame husi festa selebrasaun loron Santu Natál 25 Dezembru no tinan foun 01 Janeiru 2024, atu hametin juventude sira iha ambiente dame no paz.
“Ha’u apela ba juventude iha Dili no munisipiu hotu- hotu iha kada suku imi hola parte ba tuir kompetisaun harii prezepiu natál hanesan uluk halo tiha ona. Ho ida ne’e sei fó premiu primeiru lugar, segundu lugar, terseiru lugar too kintu lugar ne’e ba prezepiu di’ak liu,” Dehan PM, Xanana Liu husi Komunikadu Imprensa, Segunda (03/12).
PM Xanana dehan, juventu iha suku laran tenki harii paz ho domin, labele tuku malu no estraga malu, tanba se prezépiu ida iha suku laran maka hetan primeiru lugar, maibé ema baku malu no tuku malu ne’e lamerese hetan.
Tanba ne’e PM Xanana husu atu juventude sira idak-idak hatudu sira-nia kreatividade no dezeña prezepiu natál labele uza materiál besi no tenki konstrui uma prezempiu ho materiál tradisional hanesan, ai, ka au, duut hali abut no pinta prezépiu natál no Menino Jesus bele uza kor oin-oin hodi hafurak uma prezépiu ho diak.
Nia haktuir, Governu sei koordena ho Komandu Jerál Polisia Nasionál Timor-Leste (PNTL) atu halo kontrolu ba kualkér prezépiu natál ne’ebé harii besik estrada labele tuur no hemu tua iha laran.
Aliende ida-ne’e, governu la premite atu juventude sira kria konflitu durante selebrasaun loron santu natál no tinan foun, tanba natál no tinan foun atu lori moris dame no ksolok ba ema hotu.
“Dadadau ne’e governu mós harii ona prezépiu iha Palasiu Governu no Palasiu Prezidensiál Prezidente Nicolau Lobato Dili no jardin sira iha sidade Dili komesa monta ona lampu oin-oin hodi hafurak ambiente natal no tinan foun,” Haktuir PM Xanana.
