DILI: Kompañia Jigante INPEX Corporation Japaun intersante hakarak hametin kooperasaun hodi investe iha setór minara no gás Timor-Leste nian.

INPEX Corporation nu’udar kompañia jigante ida iha Japaun ne’ebé iha ona esperensia tinan barak hala’o servisu iha dezenvolvimentu indutria mina no gás iha Japaun no dadaun ne’e hala’o investimentu industria enerzia iha nasaun avansadu.

Prezidente Kompañia INPEX Corporation, Takayuki Ueda agradese tebes no sente previleziu hasoru malu ho Xefe Governu Xanana ho ekipa tanba bele fó oportunidade hodi ko’alia kona-ba futuru dezenvolvimentu i mina no gás.

“Ami ekipa husi INPEX Corporation sente previleziu tebes no biban ne’e agradese ba oportunidade hodi hasoru malu ho ita boot iha momentu ida ne’e. INPEX Corporationa hanesan kompañia boot Japaun nian, ne’ebé durante ne’e halo explorasaun no dezenvolve mina no gas no ida ne’e foin primeira ves ba kompañia INPEX Corporation hodi hasoru malu ho Primeiru Ministru,”Online INDEPENDENTE sita iha komunikadu, (16/12/23).

Fatin hanesan, Primeiru-Ministru Kay Rala Xanana Gusmão hato’o agradese no hala’o esplikasaun klean hodi konvida direita INPEX Corporation atu hala’o vizita mai Timor-Leste no hodi haree direita kondisaun Timor-Leste no ba futuru bele loke investimentu mina no gás iha Timor-Leste.

Estadu Timor-Leste liu hosi Timor GAP, E.P hola parte ona iha konsórsiu Greater Sunrise, ho partisipasaun maioria reprezenta 56,56%, Woodside (operadora) 33,44% no Osaka Gas 10%.