Prezidente BTL, EP Carlos Peloi dos Reis hateten, Bee Timor-Leste (BTL, EP) asina kontratu ho parseriu implementadór rua atu halo kanalizasaun bee moos , instala tanki rezerva bee moos ba komunidade sira iha Postu Adminitrativu Laclubar, Munisipiu Manatutu.
"Espera katak semana rua nia laran sira mobiliza ekipamentus atu halo servisu iha Laclubar, iha projeitu rua ne’ebé sei implementa, mak hanesan, kanalizasaun no instalasaun tanki bee moos,” dehan Prezidente iha Salaun BTL Kaikoli, Kuarta (26/07).
Prezidenti haktuir, orsamentu uza ba kanalizasaun no instalasaun tanki ne’e hamutuk dolar amerikanu rihun $156.
Bee moos ne’e sei oferese komunidade sira no instituisaun sira hanesan postu saude, eskola, sede suku , merkadu, igreja no seluk tan.
Prezidente BTL, EP akresenta, Projetu Konstrusaun Sistema bee moos iha Postu Administrativu Laklubar, sei implementa hosi kompañia Celijo Star Unipessoal Lda no orsamentu ne’ebé sei gasta ba projetu refere ho montante $ 468,906.58 ho durasaun tempu fulan neen.
Alende ne’e, kompañia Twins 2 Unipessoal Lda, sei kaer obra kona-bá Projetu Fornesimentu no Instalasaun Prefabricated Liner Tank, ba iha postu-administrativu Laclubar, ho durasaun tempu fulan haat no orsamentu ne’ebé sei prevé ba projetu ne’e hamutuk $ 188,035.32.
Iha fatin hanesan, Administrador Postu Administrativu Laklubar, Fransisco M. Soares hatete, populasaun iha Postu refere, durante tinan naruk hahú 2000 to’o agora seidauk asesu ba bee mos, tanba ne'e liu husi asina akordu ne’e bele oferese bee moos ba sira.
"Ohin ita asina ona akordu ho kompaña rua ne'ebé atu konstrui bee mos ba PA Laklubar, tanba tinan naruk nia laran populasaun preokupa ho bee moos,”dehan nia.
Tanba ne'e, Administrador hato'o agradese ba Oitavu Governu, liu husi BTL, EP ne'ebé halo ona kontratu hodi fornese bee moos ba komunidade.
Entretantu, Projetu bee moos ne’e ho sistema gravitasaun iha ne’ebé sei kanaliza bee hosi bee matan Leanbau ho débitu 1.1 Lps no bee matan Hatuada 2.3 Lps ne’ebé mak lokaliza iha foho Samaur, iha área suku Manelima ho elevasaun metru 1.361 (1.361m) no metru 1.417 (1.417m). No projetu bee moos ne’e, sei transforma ba sistema urbana, iha ne’ebé sei instala mos metru kontadór ba benefisiáriu sira.
Enkuantu projetu konstrusaun sistema bee moos nomos fornesimentu no instalasaun prefabricated liner tank ne’e, sei kobre iha postu-administrativu Laclubar Villa, ho uma kain 292 no totál populasaun 1.752, inklui sei fornese mos bee ba instituisaun hamutuk 13 hanesan, postu saúde, eskola, sede suku, merkadu no igreja.
