Portavos Relasaun Publika Komandu Jeral Polisia Nasionál Timor-Leste (PNTL), Superintendente Xefe Armando Monteiro informa, Polisia Nasionál Servisu Investigasaun Kriminal (PNSIK) halo kapturasaun ba ema Indonezia na’in tolu (3) no Timor-oan na’in ida ne’ebé servisu iha kompaña Fatuculu Margana bazeia ba informasaun husi Servisu Nasional Intelijensia (SNI).
Ekipa PNSIK, nia dehan, kaptura autor sira ho flagrante delicto iha sira-nia servisu fatin iha area Burger King, Kolmera.
Tuir nia, kompaña Fatuculu Margana komete kazu fraude fiskal no burla informatika. Durante ne’e sira hetan lisensa husi SERVE atu halo servisu iha area telekomunikasaun, maibe sira halo fali atividade negosiu no imprestimu ho online.
“Durante ne’e sira fó servisu ba ita-nia Timor-oan hamutuk na’in 143. Sira uza Timor-oan sira halo servisu hanesan operador ba sistema aplikasaun hotu atu sisi devedor sira iha Indonesia,” informa Amando ba Jornalista sira iha Kuartel Jeral PNTL, Kaikoli, Dili, Kuarta (24/08).
Nia hatutan, PNSIK konsege kaptura sidadaun Indonezia na’in tolu ne’ebé sai jestor ho inisial PB, AS no RA. PNSIK mós kaptura feto Timor-oan ida ho inisial FG, no prende mós ekipamentu elektronika sira hanesan komputador 41 ne’ebé durante kompania uza halo servisu, asesorios, CCVT no dokumentus sira seluk liga ho atividade kompaña refere.
“Sistema ne’e tau iha Timor-Leste, maibé atividade ida ne’e hala’o iha estrajeiru mak sira uza online hodi sisi devedor sira tuir prazu ne’ebé mak sira deve no tenke kumpre, se lae sira fo multa dobru, hodi nune’e benefisia ba kompañia ida ne’e,” dehan nia.
Tuir nia, Timor-oan ne’ebé servisu iha kompaña ne’e mós laiha koñesimentu ho kompaña nia ezistensia, indetidade no atividade.
Hafoin kapturasaun, nia dehan, PNSIK husu autorizasaun hodi detein suspeitu na’in haat durante oras 72 hafoin submete ba iha Ministériu Publiku no Tribunal atu foti desizaun final.
“Kazu ne’e foun, foin dahuluk akontese iha ita-nia rain, maibé envolve ita nia sidadaun halo servisu fó benifisiu ba kompañia sira iha estrajeiru, tanba ne’e ita sei servisu hamutuk ho parte MTKI, SERVE no ita-nia Banku Sentral no Financial Intelligence Units, oinsa atu deskobre motivu husi investimentu ida ne’e,” dehan nia.
Tuir nia, kompaña ne’e hahú ninia atividade iha fulan Marsu no foin iha fulan Agostu mak autoridade sira deteta.
