Projetu dekretu governu nian ne'e aprezenta husi Ministru Administrasaun Estatál, Miguel Pereira de Carvalho, ba kriasaun Misaun Apoiu Prosesu Resenseamentu Eleitorál (MAPRE) Giné-Bissau 2022, ba eleisaun ne’ebé prevee ba loron 18 Dezembru 2022.
"Ita apoia orsamentu total tokon US$ 1 inklui mós misaun ida dahuluk sei iha restu rihun US$ 900 iha ne’ebá para apoia sira-nia ekipamentu no halo resenseamentu foun.Dezlokasaun ita-nia ekipa na'in lima atu ba apoia," dehan Ministru Interinu Prezidensia Konsellu Ministru (MPKM), Rui Augusto Gomes, iha Palasiu Governu, horisehik.
Kriasaun MAPRE-Giné-Bissau 2022 ne’e tuir pedidu atu apoiu hodi organiza no realiza resenseamentu eleitorál, hodi rekoñese kontributu importante husi misaun tolu timoroan nian hodi apoia ba prosesu eleitorál, ne’ebé estabelese ona iha 2013, 2014 no 2018, hodi bele hala’o eleisaun livre no justu iha país ne’ebá.
MAPRE Giné-Bissau 2022 sei fó asisténsia téknika no promove asaun formasaun no kapasitasaun rekursu umanu ba órgaun administrasaun eleitorál Giné-Bissau nian no atu promove ekipamentu teknolójika hodi halo resenseamentu eleitorál.
Molok ne’e, Ministeriu Administrasaun Estatal (MAE) halo ona aprezenta relatoriu ne'ebé Governu Timor-Leste liuhusi apoia prosesu resenseamentu eleitorál iha Giné-Bissau nian ba Konsellu Ministru.
Aprezenta relatoriu ne'e husi Ministru Administrasaun Estatál, Miguel Pereira de Carvalho no Vise-Ministru Administrasaun Estatál, Lino de Jesus Torrezão, ba Konsellu Ministru relatóriu misaun hodi apoia prosesu resenseamentu eleitorál iha Giné-Bissau.
Delegasaun timoroan lidera husi Vise-Ministru, Lino de Jesus Torrezão, vizita ona Giné-Bissau iha loron 22 Jullu to’o 8 Agostu 2022, hodi halo soru-mutu ho autoridade lokál sira hodi verifika kondisaun ezistente no identifika nesesidade sira ba organizasaun resenseamentu eleitorál no realizasaun ba eleisaun livre no demokrátika iha Giné-Bissau.
