Antes ne’e Governu liu husi Protesaun Sivil konsege transporta komunidade hirak ne’e ho urjentemente ba hela temporariu no ikus mai husik de’it abandonadu to’o agora.
Iha loron 4 fulan Abril 2021, komunidade ne'e fahe ba parte rua, familia balun hela iha Canossiana Hera no Familia balun hela iha Parokia Santo Santiago Hera nian.
Akontese inundasaun iha 4 Abril 2021, ne'ebé udan kuaze oras ualu nia laran rezulta estragus no komunidade lakon buat barak hanesan uma hela fatin nomós komunidade na’in-tolu lakon nia vida tanba bee lori no labarik ida nia isin mate la hetan to’o agora.
Iha loron 14 fulan Agostu 2021, Protesaun Sivil muda sira husi sentru evakuasaun Canosiana Hera ba hela iha Kapela Bedik no iha loron 18 Jullu 2021 Protesaun Sivil muda tan sira husi sentru evakuasaun Parokia Santo Santiago Hera ba hela iha SMP4 Akanunu.
Iha 15 fulan Novembru 2021 Protesaun Sivil muda fila fali sira husi Kapela Bodik ba hela iha uma sentru Haburas Foundation no to'o agora reprezentante Governu la tau matan ba komunidade hirak ne’e.
Portavós Komunidade Apolonia Pires Pereira hateten, komunidade balun to'o agora sei hela iha SMP 4 Akanunu, no agora Diretór eskola husu ba komunidade atu hamamuk fatin ne'e, maibé komunidade la iha hela fatin alternativa.
Familia uma ka’in 13 mak ba hela fali fali ona fatin atuál hodi hein desizaun husi governu, maibé governu abandona komunidade iha fatin kuaze tinan ida resin husi loron 4 Outubru 2021 to'o agora governu seidauk tau matan ba komunidade sira ne'ebé hela iha refujiadu Hera.
Tanba ne'e sira hakarak husu klarifikasan husi Governu katak, Komunidade afetada balun naran laiha lista simu ajuda nian no komunidade ne'ebé naran sai lakoi simu ajudus refere tanba laiha rai atu hela.
Tuir Lei ba Rai Ministériu Justisa mak iha kompeténsia tomak atu esplika no identifika hodi ko’alia kona-bá estatutu rai, maibé to'o agora Ministru Justisa nunka mai atu esplika kona-bá sira nia direitu hirak ne'e.
Husi akontesimentu no inserteza husi prosesu sira ne'e hotu nu'udár sidadaun Timor Leste, komunidade hakarak husu ba Governu tenki tau komunidade sira iha fatin dignu.
Sira ne'ebé naran laiha lista simu ajuda nian, no husu Ministra Solidaridade Sosial atu iha tempu badak bele fahe ajudu ba sira tanba sira ne'ebé naran laiha ne'e vitima mos husi inundasaun.
Husu ba Governu liu-liu Ministru Obras Publika atu konstrui barrajen iha sira nia hela fatin ho urjentemente tanba fatin risku ba inundasaun.
Estadu tenke rekoñese no fo direitu legál liu-liu estatutu klaru ba sira nia hela fatin hodi labele hetan despezu arbiru bainhira dezenvolvimentu tama iha área ne'e, no uma tenke asesu ba nesesidades báziku hanesan bee moos, sanitasaun, hariis fatin, no eletrisidade.
