Prezidente Komisaun F PN, Maria Bareto Gurumali hateten, kona-ba asuntu virus Raiva ne'ebe ohin loron afeita makaas ba populasaun sira.
"Iha semana kotuk, ita-hotu akompana akontese iha RAEOA liuliu iha Pasabe no Pante-Makasar katak virus Raiva (Anjing Gila) ne'e afeta makaas ba iha komunidade iha RAEOA no tuir dadus ne'ebe ha'u akompana to'o Domingu (24/3) akontese ona ba ema na'in 21 ne'ebe hetan virus liu-husi asu tata", dehan nia, iha Plenaria Parlamentu Nasional, (26/03).
Nia afirma, tuir teste laboratorium nasional virus raiva ne'e hatudu pozitivu no ema nain rua (2) mak konsege haruka mai iha Hospital Nasional Guido Valadares (HNGV) no sira na'in rua ne'e ikus mai mate hotu.
"Ida-ne'e hatudu ba ita katak, asunto ida-ne'e seriu tebes persiza oinsa Governu bele tau asunto urjenti, oinsa bele prevene lalais situasaun virus Rabies ne'ebe mak akontese iha RAEOA, ho nune'e labele daet mai to'o Timor-Laran tomak", tenik nia.
Nia mos rekomenda ba Governu oinsa atu bele halo kontrola maka'as ba iha portu no iha Fronteira liu-husi Iha Pasabe RAEOA nian ne'ebe risku tebes, tanba besik Kefa (NTT).
"Ha'u mos ba Governu atu antisipa mos ba iha Munisipiu Covalima, Bobonaru ne'ebe area fronteira ho Indonesia ne'ebe ninia batas ne'e terrestre de'it, ida ne'e afeta maka'as ba ita se kuandu ita-la kontrola animal sira ne'e", nia relata.
Alende ne’e, husu mos ba MAPPF no MS atu kolabora hamutuk hodi bele prevene virus raiva, nune'e labele da'et ba populasaun seluk, tantu iha RAEOA nomos iha Munisipiu Bobonaru, Covalima inklui Timor-Laran Tomak.
"Ida-ne'e mak ha'u nia rekomendasaun, tanba observasaun ne'ebe mak iha hatudu katak, husi Ministériu Saude no Ministeriu Agrikultura nia servisu atu prevene Virus Raiva ne'e bo'ok aan tarde uitoan, tanba ne'e mak hodi afeita iha semana ida deit sa'e kedas ba ema na'in 21", nia kestiona.
Tanba ne'e, nia konsidera situasuan virus Rabies seriu, nune'e nia husu persiza NMinistériu Saude no Ministeriu Agrikultura atu bele foti asaun lalais hodi prevene no proteze populasaun sira.
Entretantu,Vise-Ministru Asuntu Parlamentár, Adérito Hugo da Costa, hateten rezista preokupasaun sira ne’e hodi nune’e bele emvia ba Ministériu relevante sira hodi nune’e bele toma medida ba virus rabies ne’e rasik.
“Governu liu husi Ministériu Saúde ho Ministériu relevante sira hala’o hela servisu namanas ba medida prevensaun ho entidade seluk hanesan parseiru sira sobre asuntu ida ne’e ba medida prevensaun no atuasaun ba kazu sira konkreta ne’ebé akontese iha fatin sira ne’ebé ohin deputadu sira foti ona,” nia esplika.
