Xefe Suku Tekinomata, Abilio Diamantino hatete, eletrisidade mós komunidade balun iha problema duni hanesan área Lutara neebé baliza Afasa moris iha liña eletrisidade nia okos, maibé to’o agora seidauk hetan eletrisidade ida.

 “Maibé iha VIII governu ami tenta aprejenta ona proposta, maibé to’o agora seidauk iha resposta neebé orsida liu husi semináriu ida-ne’e, ami aprejenta direita ba Sekretáriu Estadu Eletrisidade Bee no Agua Saneamentu,” Dehan Xefe Suku Tekinomata Abilio Diamantino ba jornalista sira hafoin diálogu hodi selebra loron mundiál Bee, iha Tower Fatuhada, Tersa (26/03).

Iha fatin hanesan, Xefe Suku Bibileo, Moises Acasio da Costa Pinto hatete, ko’alia kona-ba eletrisidade maiória asesu eletrisidade, maibé komunidade sira neebé knua tuan Bibileo nee la asesu ba eletrisidade.

Hatan ba kestaun ne’e, Sekretáriu Estadu Eletrisidade Agua no Saneamentu, Santos Noronha hatete, eletrisidade sistema implementasaun projetu rua, ida pakote eletrifikasaun komunitária, eletrifikasaun nasionál agora daudaun atinji ona 95%, signifika falta 5% deit mak seidauk, falta suku tolu iha Timor laran tomak mak seidauk asesu ba eletrisidade.

Tanba ne’e, ba oin saida mak atu halo ba sira ne’ebé la asesu ba eletrisidade, husi parte EDTL nian sei ajuda komunidade sira ho solar panel tau iha uma.

“Ita hatene katak ita nia komunidade sira balun hela iha foho leten, entaun lider komunitáriu bele halo pedidu ruma mai Sekretáriu Estadu Agua Eletrisidade, depois bele despaixu ba EDTL sira, atu tun ba verefika ida-ne’e mak ita sei halo,” Tenik nia.

Purtantu, Suku Bibileo totál populasaun 3.243, aldeia 8, hanesan aldeia Hare Oan, Aisahe, Amarleza, Balide Oan, Fato Hosan, Lako Uai, Mane Claran, Webae.