Komandante Jerál PNTL Komisariu Faustino da Costa informa asuntu ne’e hafoin hala’o enkontru semanal ho Prezidente Repúblika Francisco Guterres Lu Olo iha palasiu prezidensial, Bairru-pite, horisehik.

Iha enkontru ho PR Lu Olo, aleinde informa asuntu seguransa nasionál, Komando PNTL mós proposta estatutu polisia, lei organika no regulamentu disiplinar ne’ebé iha tempu badak sei submete ba governu.

Komisariu Faustino hatete, prosesu ne’e imporantante tebes ba serbisu PNTL nian oinsá atu orienta serbisu instituisaun seguransa hodi bele sai profesional hodi garantia seguransa ba povu iha futuru.

“Ita presiza halo alterasaun ba estrutura PNTL ne’ebé la’ós de’it iha nivel Komandu Jerál maibé to’o munisipíu, aumezmu tempu delegasaun kompetensia ba Komandante balun,” dehan Komandante Jeral ne’e.

Maske nune’e, Komisariu Faustino la esplika klaru kona-ba alterasaun estrutura no delegasaun kompetensia, nia hatete de’it katak tatikamente ba serbisu operasionál durante ne’e la’o hela maibé ninia delegasaun kompetensia propria ne’e hafoin lei ne’e hetan aprovasaun.