Iha lista ne’ebé fó sai iha naran rua ba kargu Primeiru Ministru, ida mak Taur Matan Ruak, no ida seluk Rui Maria de Araujo. Iha lista ne’e mós iha naran husi Sekretariu Jeral FRETILIN Mari Alkatiri ne’ebé sai nu’udar Ministru Estadu Konseleiru Primeiru Ministru ba asuntu Finansa no Ekonomia.

Aleinde ne’e, eis Prezidente Repúblika José Ramos Horta mós tama iha lista ne’e nu’udar Ministru Estadu Konseleiru Primeiru Ministru ba asuntu Negosiu Estranjeiru, no atual Prezidente CNRT Kay Rala Xanana Gusmão sai nu’udar Ministru Estadu Konseleiru Primeiru Ministru ba asuntu Seguransa no Sosial.

Ba lista ne’e, Xefe Bankada CNRT Duarte Nunes konsidera hanesan informasaun falsu.

Tan ne’e, nia husu atu públiku, liu-liu militante no simpatizante husi partidu ne’ebé envolve aan iha bloku AMP, atu labele fiar.

“Governu sombra ne’ebé ema lansa iha públiku ne’e hanesan informasaun falsu tanba ne’e labele fiar, nune’e mós informasaun ne’e sei la prezudika unidade AMP nian,” dehan nia.