Tanba ne’e, Komando apela ba komunidade sira atu labele pániku.
Enkuantu, membru F-FDTL Komponente Naval ne’e ho naran Sargentu Joanico Baptista.
Tuir Portavos Komando F-FDTL, Kapitaun José Antonio Nunes da Costa, hateten, membru F-FDTL ne’e hetan asaltu, bainhira tenta atu hakalma situasaun konfrontu entre entre joven sira iha Bidau Akadiruhun, maibé ikus mai membru ne’e mós hetan kanek.
“Purtantu ita nia militar ne'e tenta atu hakalma situasaun, maibé la konsege, tanba nia mesak, hetan ataka barak husi joventude ran manas sira. Husi instituisaun hakarak apela ba publiku katak, labele pániku ba akontesimentu ne'ebé horseik akontese, iha nasaun ne'e iha lei no ordem, iha polisia no militar no mós justisa, buat hotu sei la'o tuir regulamentu ne'ebé iha,”dehan nia iha konferensia imprensa iha Kuartel Jeneral, Fatuhada Dili, tersa ne’e (06/09).
Portavoz ne’e mós, apela ba populasaun tomak labele pániku, nafatin buka moris hodi sustenta uma laran.
Enkuantu, tuir informasaun ne’ebé espalla iha media sosial ka públiku, antes ne’e membru F-FDTL ne’e hatais sivil, maibé bainhira rona konfrontu mak nia tama ba uma hatais farda militár hodi ba hakalma situasaun.
Portavóz ne’e dehan, nia parte labele fundamenta buat balun tanba prosesu hotu sei iha faze investigasaun.
“Ha’u labele ko’alia buat ida tanba rezultadu investigasaun mak sei justifika buat sira ne’e,” katak nia.
Portavoz ne’e mós, husu ba Polisia Militar no komponente hotu atu kontinua servisu, mantein informasaun ba malu no fó apoiu maximu ba PNTL hodi kontribui ba estabilidade iha rai-laran.
Nune’e mós, kontrolu membru sira nia movimentu no servisu hodi kumpri deit ba misaun husi komando.
"Polisia no militár ne’e seguransa nasaun nian, atu halo kontrolu iha teritóriuTimor-Leste, iha oras 24 nia laran, ne’ebé iha obrigasaun ba situsaun saida de’it liu-liu garante estabilidade nasional,” haktuir Portavoz.
Entretantu, Portavoz ne’e mós afirma, molok ne’e, Komando mós apela ona ba membru sira katak, labele sai arbiru, enkuantu baihira sai karik tuir orientasaun komando nian.
“Nune’e, mós ba membru militar ne'ebé hetan fim da semana, ba uma uza ita bo'ot sira nia tempu maximu hodi tulun familia sira no nesessidade ne'ebé presiza halo,”tenik nia.
Enkuantu, membru militar ne'ebé hetan kanek ne'e, dadauk ne’e halo ona tratamenru iha Óspital Nasional Guidu Valadares (HNGV).
