Iha 25 Marsu, horseik, Komandante Jeral Guarda Nasionál Repúblicana (GNR), Tenente Jeneral Rui Alberto Ribeiro Veloso, hamutuk ho Embaixador Portugál iha Timor-Leste, Manuela Bairos, no Ministériu Interior (MI) Francisco Guterres, hala'o reuniaun ho Primeiru Ministru (PM) Kay Rala Xanana Gusmão, hodi koalia kona-ba kolobarasaun atu hadi'a di'ak liu tan servisu PNTL iha futuru.
Tenente Jeneral Rui dehan, GNR prontu atu kolabora ho Governu TL hodi ajuda PNTL atu hadia sira-nia kapasidade no intervensaun nível polisial.
"Ami prontu kolabora iha futuru ho autoridade Timorense bainhira presiza. Agora daudaun ami halo hela kolaborasaun nível protesaun sivil no nível PNTL hamutuk ho Ministeriu Interior no embaixada Portugál.”
“GNR ho onra boot prezensa iha Timor no kontinua marka prezensa iha Timor hodi ajuda PNTL atu hadia sira-nia kapasidade ho intervensaun nível polisial, no ha'u hakarak husik hela mensajen esperansa konta ho GNR nia prezensa, GNR sei tulun hadi'a di'ak liu tan servisu PNTL, PNTL ne'ebé dezenvolve iha futuru sei sai di'ak liu tan no sai polísia ne'ebé hakbesik ba populasaun no mós sei evolui ba tipu kapasidade seluk, liu-liu iha área ambiental no área sira iha fronteira, ida ne'e mak asuntu ne'ebé ohin diskuti ho Primeiru Ministru,” dehan Tenente Jeneral, iha Palásiu Governu, Tersa (25/03).
Komandante Jeral ne’e dehan, situasaun polítika iha Portugál sei la afeta ba kolaborasaun ne'ebé antes ne'e halo ona ho TL.
Governu Portugal sempre iha intensaun atu kontinua kolabora ho nasaun amigu sira, liu-liu ho TL iha área formasaun, parte polisial no mós protesaun sivil.
"Ami sei kontinua mantein programa kooperasaun sira ne'e no mós iha posibilidade sei buka atu aumenta tan kooperasaun iha área seluk," katak nia.
Iha fatin hanesan, Ministru Francisco hatete, nia akompaña Komandante Jeral GNR ne’ebé mai hodi komprimenta PM Xanana.
"Ohin komandante GNR mai enkontru ho Primeiru Ministru, primeiro mai atu komprimenta exelensia PM, segundo mai atu hato'o kona-ba intensaun GNR ne'ebé mak atu kontinua kooperasaun ho Timor-Leste, liu-liu PNTL par bele hadi'a kapasidade PNTL ninian, atu bele hadi'a mós sira-nia servisu ne'ebé ho rigor didi’ak atu nune'e PNTL ba oin bele sai polísia ne'ebé profisionál," nia informa.
Governu Timor-Leste, Ministru dehan, agradese tebes, kontinua konkorda no hakarak nafatin atu kooperasaun ida ne'e la'o ba oin nune’e bele hadi'a di'ak liu tan kapasidade intervensaun polísia sira nian no sei prepara mós Komandu PNTL ne'ebé sei lidera PNTL.
