Konselleiru polítika partidu KHUNTO, José Turquel hatete, membru CCF nomeia ona Mari Alkatiri kandidata-aan ba primeiru ministru, maibé seidauk ofisializa sai informasaun ne’e ba partidu koligasaun sira.

“Partidu KHUNTO, ami seidauk lee iha jornál ruma ke ofisializa partidu atu indijita sé. KHUNTO laiha pozisaun atu hatete A ka B”, dehan nia, hafoin hasoru malu ho bloku koligasaun iha CCF-Komoro, horisehik.

Iha fatin hanesan, Prezidente Partidu Demokrátiku (PD), Mariano ‘Assanami’ Sabino hatete, PD hola parte iha bloku koligasaun maibé seidauk ofisializa tanba to’o agora seidauk asina akordu atu sai koligasaun loloos.

Tanba ne’e, atu ko’alia kona-ba primeiru ministru sei haree bainhira asina kona-ba akordu finál ba koligasaun nian hotu ona mak haree fali ba asuntu ne’e.

“Primeiru ministru ne’e sei ida de'it, ne'ebé ita sei fó apoiu ba malu”, dehan Assanami.

Partidu Demokrátiku iha inisiu kedas bainhira atu envolve aan iha bloku koligasaun dehan ona katak mai para atu viabiliza, tanba ne’e PD sei la ezije hodi fahe podér ba malu.

“Ami nia moto mak ne’e Ba Ó Timor Ami Maubere Oan Prontu Atu Serbí, Ba Ó Timor Laiha Ezijénsia, Ba Ó Timor Laiha Rezerva Totalidade”, tenik nia.

Kona-ba postura governu nian ne’ebé seidauk define sé-sé mak atu bele sai ba membru governu, sei hein hela nomeasaun primeiru ministru kuandu iha ona bele hili nia membru governu.

Tuir Assanami, prosesu diálogu, konversasaun ne’ebe ohin loron la’o laiha membru PD ida mak bele mai ko’alia iha kotuk-kotuk ba prosesu ne’e tomak, hanesan maubere oan tenke firme iha fatin satan buat hotu ne'ebé atu akontese.

“Partidu Demokrátiku nia ema ida sei la mai husu no lobby iha kotuk-kotuk, ha’u prezidente partidu sei la aseita”, dehan Assanami.

Entretantu, Adjuntu Sekretáriu Jerál Partidu FRETILIN, José Reis hatete, ema hotu hatene Mari Alkatiri potensiál tebes atu bele sai primeiru ministru, maibé nia mós iha direitu no liberdade atu bele halo desizaun maski membru CCF fo fiar ba nia atu lidera governu ne’e.

“Ha'u hanoin nia seidauk halo deklarasaun ruma relasiona ho desizaun Comité Central FRETILIN nian, maibé iha tempu badak nia sei halo kuandu desizaun iha ona mak ami sei hato’o ba Prezidente Repúblika”, dehan nia.

Alende ne’e, partidu FRETILIN entrega ona karta ba partidu koligasaun atu haree kuandu iha pontu balun ne'ebé seidauk di'ak, bolu-malu hodi diskute fali. Kuandu di'ak ona iha loron ida ka rua tan bele asina kona-ba konkordánsia ba polítika koligasaun nian.

Alende ne’e mós partidu FRETILIN konvida bloku koligasaun PD no KHUNTO atu haree fila fali dokumentu koligasaun ne'ebé iha loron 4 Setembru asina ona kona-ba kompromisu polítika intendimentu, ne'ebé kompromisu baze ida ba koligasaun hodi responde primeiru sesaun ba inisiasaun meza parlamentu nasionál liubá.

Tuir José Reis, partidu FRETILIN iha liu husi enkontru lider CCF inisia ona enkontru kona-ba prosesu formasaun governu nian. Tanba ne’e, enkontru ho bloku koligasaun atu informa kona-ba postura governu nian ne'ebé sei harii tuir FRETILIN tenke ki'ik, efisiénsia no efikásia.

Nia hatutan, FRETILIN iha entedimentu atu kontinua halo diálogu ho partidu koligasaun sira atu bele hametin relasaun hodi garantia estabilidade governativa. Enkontru sira ne'ebé halo kontinua kolia kona-ba prinsípiu proporsionalidade, méritu atu bele partilla responsabilidade programa no implementasaun.

Alende ne’e, parte bloku koligasaun ne’e mós harii órgaun ordenasaun oinsá bele funsiona koligasaun ho reuniaun ordináriu no estraordináriu para bele konsentra nafatin ba iha asuntu hotu ne'ebé koligasaun atu bele defende hamutuk iha parlamentu nasionál.