Don Virgilio hatutan, kuandu Amu Papa presiza kardeál sira-nia apoia, liuliu apioa Uma Kreda nian atu kontinua haburas, hametin no haklaken Maromak nia liafuan rai doben Timor-Leste nian.

"Knaar kardeál liuliu atu fó apoia ne'ebé mais direita atu serbisu hamutuk ho ita nia Santu Padre. Mensajen Amu Papa nian liafuan ida ne'ebé nia fó hanoin mak tau-matan didi'ak ba o nia bibi sira, nia kontente tebtebes haree Timor barak partisipa iha eventu ne'e," dehan nia.

Nia hatutan, tau-matan didi'ak ba bibi sira mak tau-matan didi'ak ba povu no sarani sira, ne'e mak Amu Papa nia liafuan tatoli ba kardeál hotu, liuliu Timor-Leste.

"Povu sarani rai doben Timor-Leste ninian dadeer ida ne'ebé di'ak duni mak sai oportunidade furak ida ba ita hotu bele halibur hamutuk iha momentu ne'e no iha loron ne'e hakarak aproveita oportunidade ida agradese no fó obrigado ba timoroan tomak no sarani tomak, ita-boot sira nia domin, ksolok ne'ebé ita hatudu ba malu iha loron hirak ne'e nia-laran," dehan Amu Virgilio.

Domin ksolok ida ne'e simu pesoalmente maibé hanesan kardeál partilla fila-fali ba timoroan tomak nia domin no ksolok ne'ebé manifesta liuhusi dalan oioin durante loron hirak ne'e sei kontinua iha aban misa Tasi-Tolu.

Eminensia Kardeál ho aviaun Europa Atlántic to'o iha aeroportu internasionál prezidente Nicolau Lobato, iha Segunda (5/9), tuku 07:05, simu direita husi Padre Guilermino da Silva ho Ministru Administrasaun Estatal (MAE) Miguel Pereira de Carvalho, hafoin akompaña lia dadolin husi kultura Munisípiu Baukau, Ossu Nahareka, tuir fali parada husi eskuteiru, remata eminensia kardeál kontinua ba iha Igreja Katedral hodi fo bensaun ba sosiedade tomak.

Observasaun jornalista iha aeroportu, sarani, madre no pdre antuziasmu. Partisipa mós husi Presidente Repúblika, José Ramos Horta, membru Parlamentu Nasional, membru governu, Bispo Dioseze Maliana Dom Norberto  Amaral, reprezentante Santa Sé Nunsiu Marco Prizi.

Observa mós hahu husi rotunda Nicolau Lobato tama to'o Igreja Katedral komunidade sira kaer bendera Timor-Leste ho bendera Vatikanu hamriik iha dalan ninin hodi simu eminensia Kardeál Dom Vigilio do Carmo da Silva.

Agradese Delega Xanana

Entretantu, Kardeál Don Virgilio do Carmo da Silva, mós agradese ba Prezidente Republika delega Xanana Gusmão hodi akompana eventu ne'e to'o rohan. Agradese mós ba Primeiru Ministru nia delegasaun sira no ekipa hotu.

"Partikularmente hakarak agradese ita nia nai Prezidente Repúblika Jose Ramos Horta maske labele partisipa iha neeba, maibe delega ekipa ida ne'ebé xefia husi Xanana Gusmão ho ninia ekipa ba partisipa eventu iha ne’ebá to'o hotu," dehan nia.

Agradese mós ba Primeiru Ministru, Taur Matan Ruak, maski labele to'o iha ne’ebá maibé delega mós ekipa ne'ebé xefia husi Ministru Prezidensia Konsellu Ministru, Fidelis Manuel Leite Magalhaes, hamutuk ho Ministru Turizmu Komérsiu Industria, Jose Lucas do Carmo, ne'ebé reprezenta Governu ba partisipa iha eventu ida ne'e.

Agradese ba Prezidente Parlamentu Nasinonal tanba delega mós ekipa ida ne'ebé sefia destinta Deputada Maria Angelina hodi ba partisipa.

"Ha'u agradese ba ema oin-oin liu-liu ba embaxadora Timor nian iha Vatikanu ho ninia ekipa tomak ne'ebé akoila Ami hotu fo apoia hodi hala'o serbisu oin-oin ne'ebé durante ami estadia iha Roma. Agradese mós ba komunidade Timor-oan madre, Padre iha Roma," nia akresenta.

Timoroan sira husi Roma, Irlanda, Portugal ne'ebé mós ba tuir selebrasaun ida ne'e agradese ba sira nia sakrifisiu no ba sira nia sakrifisiu domin ne'ebé hatudu hodi ba tuir, Agradese Embaxadora iha Portugal ho ninia ekipa.

"Bansira hotu ninia apoia durante loron hirak ne'e ha'u liu husi portugal, agradese ba Uma kreda Timor nian ba konferensia Episkopal Timor nian einpartikularmente agradese ba monsitoriu Marco, kuandu iha problema ruma hodi kontinua hodi fo apoia fasilita serbisu ne'ebé hala'o hodi realiza konsistoriu ne'e di'ak liu," nia tenik.

Iha sorin seluk, Tenente Jeneral reformadu, Lere Anan Timur hatete, orgullu boot ba kardeál, ida ne'e hatudu Timor-Leste marka diferensa duni.

"Ohin ita simu ita-nia kardeál ba onra boot ba Timor ita marka iha Asean katak primeira vez ita iha kardeál iha rai doben Timor-Leste," dehan nia.

Nia hatutan, diferensa tanba iha funu laran Timor oan na'in rua Premiu Nobel da Paz iha Asean nia laran, ida ne'e orgullu tebes tanba Timor iha tan kardeál ida hodi kompleta mós saida mak iha funu halo ona.

"Ha'u hanoin katak orgullu boot ba Timor motiva mós ba jerasaun foinsae tenke banati tuir ba ita nia aman ne'ebé hetan poder husi Maromak ba atu ukun rai Timor ne'e. Ne'ebé ha'u hanoin katak onra boot ba ha'u onra boot ba ema hotu liu-liu sarani sira," nia akresenta.

Igreja Katólika iha papel boot tebtebes iha komunidade no sosiedade nia le'et eduka la'os atu sai matenek, polítika de'it, maibé eduka atu sai matenek no sarani di'ak.

"Ida ne'e mak ha'u hanoin katak Timor oan hotu liu-liu ba jerasaun foinsae hatene ba oin fiar ba Maromak, fiar ba ita nia kultura tradisaun Timor sei buras no forte liu tan," tenik nia.