Sekretáriu Estadu Konsellu Ministru no Komunikasaun Sosiál, Matias Freitas Boavida hatete, Konsellu Ministru mós aprova karta ida kona-ba desizaun ikus ba akordu fronteira marítima nian, iha Novaiorke, Estadu Unidus Amérika (EUA).

“Governu fó karta full latter ida ba Ministru Ministru Agio Pereira hodi responsabilidade atu prepara ba akordu fronteira marítima nian,” dehan nia, iha Palásiu Governu, horisehik.

Nia dehan, Governu fó kompeténsia tomak ba Ministru Agio Pereira mak toma responsabilidade hodi asina akordu ba tasi Timor nian, tanba Xefe Governu la iha kompeténsia atu asina akordu ne’e.

Tuir nia, Governu prepara ona dokumentu ida hodi entrega ba Ministru Agio Pereira hodi deklara molok asina akordu ba delimitasaun fronteira marítima nian.

Governu konstitusionál fó konfiansa tomak ba Governante ne’e, tanba prosesu tomak Agio Pereira mak iha koñesimentu kle'an liután asuntu fronteira marítima nian.

Antes ne’e, Primeiru Ministru, Mari Alkatiri hateten, asinatura nota entendimentu ne’e bainhira Xanana Gusmão lakohi asina, Xefe Governu mós sei lakohi atu asina no sei entrega ba Ministru ba Delimitasaun Fronteira Marítima Hermenegildo ‘Agio’ Pereira.

Alkatiri mós lakohi atu partidu polítika balun uza kazu fronteira marítima nu’udar matéria ba kampaña. Ne’e duni, husu ba partidu sira ne’e keta privatiza tasi Timor sai interese partidária.

Di'ak liu keta privatiza tasi Timor nu’udar matéria kampaña, sei lae loke debate kona-ba prosesu tasi Timor nian. Tanba ne’e, interese nasionál, la’ós partidu ida nia esforsu no organizasaun nian interese.

Tuir nia, bainhira Xanana mak luta ba prosesu ne’e tenke tau nia naran, tanba nia mak nu'udar méritu ba prosesu tasi Timor tomak. Ne’e duni, tenke tau Xanana nia naran ba istória luta ba tasi Timor.