Suspensaun ba ensinu, aprendizajen no prátika artes marsiais no enserramentu temporáriu ba fatin no instalasaun hotu-hotu ne’ebé destinadu ba ensinu, aprendizajen no prátika artes marsiais, ne'ebé inisialmente hetan aprovasaun husi Rezolusaun Governu númeru 17/2024, loron 24 fulan-abril.
Vise Ministru Asuntu Parlamentár Aderito Hugo da Costa hatete, Rezolusaun Governu nian ida ne'e ho objetivu atu konsolida no reforsa pás sosiál ne'ebé alkansa ona husi kedas fulan Novembru tinan 2023. Ho abordajen ida ne'ebé konsideradu no kontroladu, hakarak atu iha futuru, permite prátika artes marsiais nian iha de’it kontestu desportivu, hodi promove ezersísiu saudavel no kontribui ba edukasaun no formasaun sívika no umanista ba joven sira.
Nia haktuir, maibé iha tempu ida ne’e, nafatin mantein suspensaun ba ensinu, aprendizajen no prátika artes marsiais no enserramentu temporáriu ba ninia fasilidade sira. Governu felisita populasaun, liu-liu joven sira, ba kolaborasaun ne’ebé sira presta ona hodi kumpre Rezolusaun Governu númeru 17/2024, loron 24 fulan Abríl, ne’ebé kontribui tebes ba manutensaun orden no pás sosiál iha país laran tomak.
"Primeiru deliberasaun ida sobre terseiru faze suspensaun bá atividades Arte Marseais ninian kontinuasaun, imi hotu hatene aprezentasaun ida husi Ministru Juventude Desportu sobre suspensaun Arte Marseais bá dala tolu nian durante fulan 6," dehan nia, hafoin reuniaun Konsellu Ministru iha Palásiu Governu, Kuarta (30/10).
Nia fundamenta, Primeira faze fulan 6, Segunda faze mós fulan 6 ne'ebé ke hotu iha fulan Outubru ne'e no agora kontinua fali ga terseiru fulan neen ninian hahú husi fulan Outubru ne'e to'o tinan oin.
"Hanesan imi hotu akompaña desde introdusaun faze suspensaun ida ne'e medidas hotu-hotu halo involve entidade hotu-hotu liu-liu Setór seguransa ninian no mós hetan resposta pozitivu tebtebes tan ne'e mak kontribui ba situasaun seguransa estavel bá eventu-enventu nasionál sira ne'ebé ita selebra iha tinan ida ne'e lao ho di'ak," nia salienta.
La'o ho di'ak tanba resposta bá jestu suspensaun bá atividades sira ne'e pozitivu tebtebes husi parte hotu-hotu inklui husi Juventude sira mós ho responsavel sira Arte Marseais nian pozitivu tebtebes.
Kontinua suspensaun bá atividades hotu-hotu Sentru treinamentu ka formasaun sira nian ne'e mós suspende hotu para kontinua haree sira ninia dezempenu. Einprinsipiu mezmu halo suspensaun mais iha observasaun no resposta pozitivu tebtebes husi parte hotu-hotu tan ne'e mak kontinua halo suspensaun.
"Mais imi hotu hatene katak iha Ultimu mes ida komesa mosu fali uitoan-uitoan, la hatene tanba saida mais iha fali tendensia mosu fali uitoan perturbasaun balun nível ki'ikoan, maibé Kompara ho fulan sira antes desde introdusaun rejime suspensaun ninian ne'e ita dehan katak kuaze laiha mais ikus, ikus ne'e mosu uitoan," nia dehan.
Tan ne'e mak haree bá situasaun sira ne'e hotu KM kontinua aprova proposta Rezolusaun ida ne'e para kontinua terseira faze suspensaun.
2025 Orienta Hanesan Atividades Desportiva
Iha fatin hanesan Ministru Juventude Desportu Arte Kulturá (MJDAK) Nelio Izac Sarmento hatete, suspensaun ida ne'e maka hatudu ninia efetivu maka iha tinan 2025 orienta bá atividades desportiva.
"Lo'os duni iha Konsellu Ministru ajenda Importante halo fali análiza bá Dekretu Lei Governu anterior kona-ba suspensaun Arte Marseais depois rona tiha Informasoens no preokupasaun balu kona-ba aktus violentus ne'ebé sei iha la'os barak hanesan uluk maibé uitoan-uitoan sei mosu. Depois rona tiha Informasoens sira ne'ebé ami aprezenta, Konsellu Ministru propoin sei suspende tan Arte Marseais," nia dehan.
Nune'e hodi orienta bá Ministériu Interiór, Ministériu Edukasaun, Ministériu Ensinu Superior Arte Kulturá atu kontinua nafatin serbisu besik liu tan ho grupu Arte Marseais sira hodi haree mós kona-ba sentru treinamentu Juventude sira hodi nune'e hotu bele intende ona.
"Katak ita prátika Arte Marseais ne'e atu ba iha atividade Desportu hodi hetan prestasaun, tanba ida ne'e ami toma nafatin nota husi Komisaun Reguladora Arte Marseais no toma nafatin nota bá Instituisoens ne'ebé mai husi Rezolusaun foun ne'e hodi nune'e KRAM halo nafatin nia serbisu hamutuk ho Sentru Treinamentu Arte Marseais nian inklui Juventude arte Marseais nian," nia dehan.
Define mós regulamentasaun bá jogus arte Marseais nian no mós regulamentasaun sobre tinkatan tinkatan sira iha arte Marseais sira. Bu'at sira ne'e hotu komplenta ona ka halo serbisu hamutuk komplenta ona maka tuir fali mai Governu sei haree atu orienta atividades desportiva bá arte Marseais.
"Ha'u hanoin suspensaun ne'e sei bá fulan 6 tan purtantu Fulan Novembru ne'e to'o fali tan parese fulan Marsu ka Maiu 2025. Entaun iha neeba ita sente katak sé atitude arte Marseais sira hanesan ne'e, ida ne'e Oportudade di'ak tanba tinan oin ita Orienta bá atividades desportiva," tenik nia.
