“Se uluk ita nia aswain sira halo sakrifísiu boot, fó isin hodi defende ita nia independénsia, liberdade no soberania, ohin ita presiza aswain foun, presiza nafatin ema ne’ebé bele kontinua aswain sira nia luta,”dehan Sekretáriu Estadu Komunikasaun Sosiál, Expedito Loro Dias Ximenes, iha Palásiu Governu, bainhira sai inspetór ba serimónia hasa’e bandeira nasionál, ne’ebé realiza kada fulan iha semana dahuluk, Segunda ne’e (04/11/2024).
Nia hatutan, ba funsionáriu públiku hotu atu kaer metin espíritu pretense ba Estadu no Nasaun.
“Hala’o kna’ar ho didi’ak, banati tuir ita nia inan feton sira, banati tuir juventude no aswain sira,” Governante subliña iha diskursu badak.
Hanesan funsionáriu públiku, hanesan mós forsa ne’ebé fó apoiu ba Estadu no Governu iha prosesu konstrusaun estadu no nasaun ne’ebé la’o daudaun.
Tanba ne’e, Sekretáriu Estadu husu ba funsionáriu tomak atu halo servisu maka’as, atu nune’e bele atinji metas ne’ebé ema hotu hakarak.
Iha oportunidade ne’e, Governante ne’e sita mós hananu funsaun públika nian ne’ebé haktuir, liuliu hanesan funsionáriu promete atu serví ho lealdade, defende patria ho servisu ne’ebé hala’o, ho prestasaun ne’ebé di’ak, hodi konduz povu ba moris di’ak no hala’ao kna’ar hotu tuir lei no konstituisaun haruka.
“Ita oras ne’e daudaun, prepara ba halo diskusaun ba orsamentu jerál estadu, liuliu ba kargu xefia sira ne’ebé atu asina orsamentu iha ida-idak nia ministériu, nafatin ka’er metin ba liafuan ne’ebé Señor Primeiru Ministru hato’o katak, osan povu nian ita tenke jere ho didi’ak,”
Ho nune’e, Sekretáriu Estadu mós husu, atu hotu-hotu akompaña nafatin diskusaun iha Parlamentu Nasionál no fó kontribuisaun ho komparénsia.
Entretantu Sekretáriu Estadu mós akresenta iha fulan Novembru ne’e iha eventu nasionál tolu ne’ebé akontese inklui Loron Nasionál Feto, Loron Nasionál Juventude no Loron Proklamasaun Independénsia.
Governante ne’e konsidera loron importante tolu ne’e nu’udar reflesaun ne’ebé timoroan sira liuliu funsionáriu públiku sira atu presta servisu ho professional liutan.
