Iha ninia reuniaun, Konsellu Ministru (KM) halo aprovasaun ba Projetu Proposta Lei kona-ba Rejime Organizasaun no Prátika Desportiva Arte Marsiál sira iha Timor Leste.
"Konsellu Ministru aprova proposta lei ida kona-ba Rejime Organizasaun no prátika desportiva ba arte-marsiais sira. Entaun lei ida ne'e halo saida? Sei hasai tiha Lei Númeru 5 ida komponente iha lei armas brankas kona-ba prátika Arte Marsiais, tau fali lei foun, sei introdus komponente importante rua ka tolu, proposta Lei ne'e sei lori mudansa boot," dehan Ministru Prezidensiá Konsellu Ministru (MPKM), Fidelis Manuel Leite Magalhaes, hafoin reuniaun KM iha Palásiu Governu, Kuarta (08/03).
Tuir nia, lei foun ne’e ezije organizasaun di'ak liu no ezije responsabilidade ba arte-marsiais, no mós sei hatuur renponsabilidade pessoal no responsabilidade organizasaun kolektiva.
Iha parte balun, nia hatutan, ezije penalizasaun penal kriminalizasaun maibé introdus mós kontra ordenasaun multa sira.
“Karik membru sira ka individual halo violasaun ruma ne'ebé mak konsidera hanesan la'os krime maibé violasaun, ema ne'e sei sujeita ba iha sansaun par kontribui ka iha kontra ordenasaun.”
"Kontra ordenasaun ninia eskala ketak ne'ebé iha montante fixa ne'ebé mak aprovadu, se karik individu ida mak komete nia husi zero to'o $200 dólar, kuandu organizasaun ne'e husi $200 dollar ba leten,” dehan nia.
Aleinde ne’e, nia dehan, ba futuru sei introdus tan sistema pontuasaun, katak iha sanak husi grupu artemarsiais ne’ebé la kumpre lei sei redus ninia pontu.
“Se ranting ida ne'e la halo tuir lei KRAM sei redus sira ninia poin. Bainhira KRAM redus poin ba rantin ida, nia organizasaun tomak sei hetan redusaun poin, ne'ebé redus sei lori ba saida? Se bele lori ba taka tiha ranting ne'e se violasaun boot liu, depois bele prosesa to'o taka organizasaun ne'e, se bele lori to'o tribunal par hetan desizaun final taka orgazasaun ne'e. Ne'ebé taka ranting ne'e desizaun administrativa, KRAM rasik bele halo desizaun sira taka ranting bainhira la priense rekezitus, maibé ita garante KRAM mós serbisu ho neutralidade," katak nia.
KRAM sai Institutu Públiku
Liu husi ninia reuniaun, Konsellu Ministru aprova mós Projetu Dekretu Lei ba kriasaun Komisaun Reguladora Arte Marsiál (KRAM), Institutu Públiku (IP) no aprova ninia estatutu.
Kriasaun ne’e, tuir Ministru Fidelis, ho objetivu atu hametin pozisaun Komisaun Reguladora Arte Marsiál.
Fidelis hatutan, diploma ne’e halo transformasaun KRAM nian ba Institutu Públiku ho autonomia téknika, administrativa, finanseira no patrimóniu rasik.
“Institutu Públiku ida ne’e sei iha misaun atu regula no fiskaliza ensinu, aprendizajen no prátika arte-marsiál hodi haree liu ba dezenvolvimentu fíziku no mentál husi indivídu sira, hodi kontribui ba promosaun sidadania ativa, inkluzaun sosiál no laiha violénsia.”
Ba oin, Fidelis dehan, Komisaun sei iha atribuisaun área importante tolu: (1) Area kontra-ordenasionál, hodi sai responsavel atu halo instrusaun ba prosesu kontra-ordenasaun sira nian no atu aplikasaun sira-nia sansaun; (2) Area dixiplinár; no (3) Fiskalizasaun ba federasaun sira ne’ebé ho utilidade públika desportiva tuir Lejizlasaun ne’ebé vigora hela.
“Prevee katak ezersísiu ba atribuisaun KRAM sei regulamenta tuir mai no katak parte ida husi ninia funsaun sira, ba oin, sei ezerse husi sira-nia federasaun rasik, hafoin ninia estatutu ne’e hetan rekoñesimentu,” dehan Fidelis.
