Ministru Prezidensial Konsellu Ministru, Fidelis Leite Mangalhães hatete, PNOT-TL ne'e hanesan ezersísiu dahuluk husi planeamentu territoriál ba nivel nasionál ne'ebé realiza ho enkuadramentu legál no institusionál ne'ebé adekuadu, haré promosaun ba modelu ida dezenvolvimentu nasionál sustentavel no inkluzivu.
Planu ne'e sei aplika ba territóriu tomak Timor-Leste nian, inklui mós ba rejiaun Oekusi Ambenu no illa sira Ataúru no Jako, ho área ida-ne'ebé hamutuk 14.919 km² no governa husi prinsípiu sira partisipasaun nian, subsidiariedade, prevensaun, prekausaun, ekuidade ka solidariedade sosiál, no efisiensia ambientál no sosial.
Ne'e importante tebes tanba sei marka diferensia husi governasaun ida ba governasaun sira seluk tanba hatene katak iha tinan barak nia laran iha prosesu dezemvolvimentu ne'ebé sei falta instrumentu importante ida ba iha planeamentu nia.
"No ho fiar katak sei halo diferensia iha governasaun ne'e ba iha ba governasaun seluk tamba ida ne'e hanesan pasu politíka imporyante ida iha dezemvolvimentu ne'ebé mak planeadu no organizadu liu iha tempo oin mai," dehan Ministru iha Palasiu Governu, Kuarta (12/04).
Ministru esplika, sei Propoin medida planeamentu 61 no asaun sira hamutuk 117 ne'ebé sei implementa iha domíniu lima hanesan, ambientál, rede urbana no povoamentu rurál, produtivu, infraestrutura no ekipamentu sira ho institusional no organizasionál.
"PNOT-TL ne'e hanesan instrumentu dezenvolvimentu territoriál ida-ne'ebé estabelese ba opsaun boot sira hodi organiza territóriu nian, bjetivu atu promove dezenvolvimentu integradu ida, harmoniozu no sustentavel ba país, atu garante koezaun territoriál no atu hamenus asimetriál territoriál sira," dehan Ministru.
Nia dehan, ho objetivu ida mós atu haforsa territóriu hanesan fatór integradór ba politika sira setoriál nian no orienta polítika territoriál eskala ki'ik sira.
Planu Nasionál Ordenamentu Territóriu nian sei konstitui hanesan instrumentu-xave hodi estabelese sustentabilidade ba baze sira dezenvolvimentu sosial, territorial no ekonomiku Timor-Leste nian.
Promove integrasaun setór sira hanesan saúde, edukasaun, komunikasaun, transporte sira, ba enerjia no ba ekonómika nasionál, hadi'a sistema dezenvolvimentu urbanu no rurál, ba nivel nasionál, munisipál no lokál, ho konsiderasaun ba dimensaun ambientál.
