Ministru Edukasaun Juventude no Desportu (MEJD) Armindo Maia hatete, MEJD sei halo despaixu ida relasiona ho fenomeno eilipse solar atu nune'e estudante sira bele hakmatek iha uma.
"Sei hatun despaixu sikular ruma, atu nune'e iha loron ne’ebé mosu fenomena eklipse solar, estudante sira hakmatek iha uma no evita kontaktu direita ho loron-matan,” dehan Ministru iha Palasiu Governu, Kuarta (13/04).
Iha fatin ketak, Prezidente Repúblika, José Ramos Horta, husu média sira kontinua dezamina informasaun kona-ba eklipse solar ba komunidade sira ne'ebé hela iha área rurál.
Prezidente dehan, eklipse solar nu'udar eventu ida ne'ebé akontese dahuluk iha tinan 100 nia laran.
Iha 20 Abril ne'e, nia dehan, eklipse solar akontese direitamente iha Timor-Leste nia leten, husi Kom, Tutuala, Jako, Lospalos bele taka 100% no iha Dili 79%.
"Perigu tebtebes, liu-liu ba jovem, labarik ne'ebé la hatene bele haré. Fahe informasaun, hatete labele hateke ba loron, tanba nia lataka 100%. Iha rai lalika temi nia naran tanba buat tékniku ne'e perigozu tebes, mezmu babain ne'e iha loron manas iha rai ultra violeta ne'e provoka kankru, buat hotu tenki kuidadu ba ida ne'e," dehan Prezidente.
Entretantu, Ministru Administrasaun Estatal (MAE) Miguel Pereira de Carvalho husu ba partidus pólitikus sira atu halo sosializasau ba populasaun no eleitores sira ne'ebé partisipa iha atividade kampaña eleitoral atu evita an hodi kontaktu direita bainhira akontese eklipse solar.
Partidu Polítiku sira nafatin halo atividade kampaña eleitoral tuir kalendáriu ne'ebé CNE aprova ona.
