Sekretaria GMP-TL, Elvina Sousa hatete, GMP-TL ho PITL realiza aktividade, ne'ebé apoiu husi Uniaun Europeia, atu hasa'e koñesimentu públiku nia kona-ba partisipasaun feto no EhD iha eleisaun ne'ebé sei akontese iha 21 Maiu.
"Ami halo atividade ida ne'e atu hasa'e koñesimentu, hanesan mos edukasaun sívika ba públiku nia partisipasaun feto maluk nia portador Difisiensia sira iha eleisaun ida ne'e," dehan Sekretária GMPTL iha Salaun Delta Nova, Kinta (13/04).
Sekretária esplika, eleisaun inkluziva atu fó oportunidade ba portador difisiensia sira, fó oportunidade, kondisaun ne'ebé asesivel ba EhD sira atu asesu ba Sentru votasaun.
Tanba hare katak iha sentru votasaun barak mak la asesivel ba portador difisiensia liliu ba sira ne'ebé uza kadeira roda.
Iha fatin hanesan, Diretóra PITL, Fátima Estrela Soares esplika, objetivu husi seminariu, atu organizasaun no sosiedade sivil, órgaun sira jestaun eleisaun no parseriu eleisaun hirak seluk hamutuk haklean sira nian kompriensaun, foku iha enkuadramentu eleitoral ho topíku importante sira hanesan, inkluzaun, igualdade no partisipasaun.
"Ami haksolok bele realiza atividade ida ne'e hamutuk ho parseria sira hotu no GMPTL hodi promove feto, joven no EhD sira atu partilla dezafiu no hanoin sira hodi kontribui ba ultrapasa dezafiu sira iha prosesu eleisaun," katak nia.
Iha biban ne'e mós, Embaixador Interina Uniaun Europeia iha TL, Dorthe Wacker hatete, Uniaun Eropeia nu'udar entidade ne'ebé apoia maka'as ba Demokrasia no direitus umanus iha TL.
"Ami espera katak aktividade sira hanesan seminariu bele kontribui ba empoderamentu sosiedade sivíl no reforsa esforsu sira gusi governu Timorense no povu atu harii demokrasia ida forte no sustentável," tenik nia.
Enkuantu, semináriu ne'e realiza durante loron rua hahú 13-14 Abril, ne'ebé partisipa husi feto, feto foinsa'e, mane, EhD, komunidade LGBTQI, Asosiasaun feto Potensial, Rede feto TL, xefi suku feto sira, Organizasaun Sosiedade Sivil, Akadémiku, Movimentu Estudantil Universitariu, CNE no STAE.
