“Tanba kauza husi rai-nakdoko foin lalais, ne’ebé afeta ba rejiaun ne’e, ho konsekuénsia grave, ho konsekuénsia grave, inklui lakon vida, dezlokasaun populasaun no destruisaun ba infraestrutura sosiál, ekonómika no ambientál,” Sita komunikadu ne’ebé INDEPENDENTE asesu husi Ministériu Prezidénsia Konsellu Ministrus, Kuarta (02/04).

Molok ne’e, Governu Timor-Leste liu husi Komunikadu Imprensa hato’o manifesta Solidariedade ho Povu Tailándia no Myanmar hafoin Rai-nakdoko ne'ebé maka'as

Governu Repúblika Demokrátika Timor-Leste espresa nia konsternasaun no solidariedade ne'ebé maka'as ho Governu no Povu sira Tailándia no Myanmar nian, ne'ebé maka afetadu maka'as hosi rai-nakdoko ho magnitude 7.7 ne'ebé maka halo nakdoko rejiaun ne'e iha loron-sesta ne'e, loron 28 fulan-marsu tinan 2025, hodi hamosu vítima mortál, kanek no estragu materiál oioin.

Enkuantu, Autoridade Thailandeza sira konfirma ona, to'o agora, pelumenus ema na'in tolu nia mate iha Bangkok, hafoin edifísiu ida ne'ebé sei konstroi hela monu, ho ema sanulu ba sanulu ne'ebé maka sei fó sai hanesan lakon.

Iha Myanmar, rai-nakdoko ne’e, ne'ebé nia episentru lokaliza besik sidade Mandalay, hamosu deklarasaun estadu emerjénsia nian iha rejiaun oioin nasaun nian.

Ho situasaun ne’e, Timor-Leste hamutuk iha sofrimentu povu maun-alin sira rejiaun ne’e nian no hato’o nia sentidas kondolénsias sinseras ba família vítima sira nian, hodi dezeja rekuperasaun lalais ba sira ne’ebé kanek no ba sira ne’ebé afetadu diretamente hosi kalamidade ne’e. Governu hamriik iha solidariedade ho esforsu emerjénsia no rekonstrusaun nian iha nasaun afetadu sira, hodi rekoñese reziliénsia no forsa hosi sira-nia populasaun iha tempu adversidade boot ida-ne’e.