Iha desizaun ne’e, governu dasia mós deside taka temporáriu ba fatin no instalasaun hotu-hotu ne’ebe destinadu ba ensinu, aprendizajen no prátika artes marsiais.
Projetu rezolusaun ne'ebé Governu aprova ne'e aprezenta husi Primeiru Ministru, Kay Rala Xanana Gusmão.
"Medida ida ne'e fó kontinuasaun ba Rezolusaun Governu númeru 45/2023, loron 10 fulan Novembru, ne'ebé mak prolonga ona husi Rezolusaun Governu númeru 17/2024, loron 24 fulan Abríl no númeru 60/2024, loron 7 fulan Novembru," deklara governu hanesan INDEPENDENTE sita husi komunikadu imprensa husi gabinete Prezidensia Konsellu Ministru, Kuarta (02/04).
Razaun hirak ne’ebé motiva suspensaun ba ensinu, aprendizajen no prátikas artes marsiais, no halo enserramentu ba ninia espasu sira, mantein nafatin.
Medida ne'e kontinua konsidera nesesáriu hodi hametin pás sosiál ne'ebé hetan dezde Novembru 2023 no asegura katak iha futuru, prátika artes marsiais akontese de’it iha ámbitu desportivu, hodi promove valores disiplina, sivizmu no formasaun umanista entre joven sira.
"Ida ne’e mak sai justifikasaun hodi estende suspensaun no enserramentu temporáriu ba instalasaun sira ne'ebé relasiona ho atividade sira ne'e," governu fó razaun.
Molok ne’e, bainhira hala’o vizita ba munisipiu Kovalima, iha 26 Marsu ne’e, Prezidente Republika José Ramos Horta hatete katak nia ho Primeiru Ministru, Kay Rala Xanana Gusmão, ko'alia ona kona-ba reativa atividade grupu artemarsial no arteritual, maibé desizaun ne’e iha Konsellu Ministru.
"Ita iha fulan sira nia laran ne'e hatudu ona, halo kontribuisaun di'ak hametin dame, hamate violénsia. Ha'u ho Primeiru Ministru ko'alia tiha ona dala hira ona, foin daudaun Kinta-feira ko'alia fali, ida ne'e Konsellu Ministru mak sei halo desizaun foti ka la foti bandu atividade," dehan PR Horta hafoin fahe nesésidade baziku ba ema ho nesésidade espesiál iha Kovalima.
Ba ninia hanoin rasik, Xefe Estadu ne’e prefere atu reativa atividade artemarsial no arteritual.
"Ha'u-nia rekomendasaun mak hotu-hotu hatene ona, kleur tiha ona ha'u-nia rekomendasaun atu halo tiha levantamentu, foti tiha bandu kona-ba atividade arte marsiais," katak Xefe Estadu ne’e.
