Iha 2 Abril, horseik, Konsellu Ministru (KM) aprova Projetu Dekretu Lei, ne’ebé, ho uzu autorizasaun lejizlativa ne’ebé hetan husi Lei númeru 7/2024, 23 Outubru, halo alterasaun daruak ba Lei númeru 8/2004, 16 Juñu, ne’ebé aprova Estatutu Funsaun Públika.

Projetu rezolusaun refere aprezenta husi Ministru Prezidénsia Konsellu Ministrus, Hermenegildo ‘Agio’ Pereira, no Prezidente Komisaun Funsaun Públika, Agostinho Letêncio de Deus.

"Diploma ida ne’e estabelese limite tinan 65 nu’udar idade obrigatóriu hodi remata relasaun traballu funsionárius públikus no ajentes Administrasaun Públika nian, ne’ebé sei akontese automatikamente iha loron ne’ebé traballadór atinze idade refere," deklara KM ne’ebé Jornal INDEPENDENTE sita husi Ministru Prezidensia Konsellu Ministru, Kuarta (02/04).

Medida ne’e hakarak atu promove joven sira ba kuadrus Administrasaun Públika nian, garante renovasaun jerasionál no hadi’a kualidade no efisiénsia servisus ne’ebé presta ba populasaun.

Diploma ne’e determina mós katak Komisaun Funsaun Públika (KFP) tenke notifika traballadór, ninia entidade empregador no Seguransa Sosiál pelumenus loron 90 molok hakotu funsaun.

Iha situasaun sira ba interese públiku ne’ebé fundamenta ho loloos, no bainhira labele substitui imediata traballadór ne’e, sei posivel atu prolonga hodi hala’o funsaun, tuir akordu hamutuk, to’o tinan 68.

“Diploma ne’e hahú vigora iha loron 1 fulan-janeiru tinan 2026.”

Tuir dadus, KFP rejista Funsionáriu Públiku no Ajente Administrativu iha territóriu ho idade tinan 65 hamutuk na’in 2.235.