Sekretáriu Estadu Formasaun Profisional no Empregu Rogério Araujo Mendonça hatete, akordu ne'e importante tebes ba governu Timor-Leste ho Governu Japaun liu hosi SEFOPE ho Asosiasaun Dezenvolvimentu Rekursu Humanu Japaun Norte ne'ebé hakarak simu jovem Technical  Intert Trainer (TIT) atu ba servisu iha Japaun.

“Sira hakarak simu jovem TIT ne'ebé mak sei bá partisipa modelu hanesan servisu, maibé Japaun uza fila-fali ninia termu TIT sai hanesan mós programa mobilidade laboral, entaun empregador ne'ebé mak ohin mai fatin ida ne'e, sira mós hakarak atu simu ita nia jovem sira ne'ebé mak atu ba TIT iha Japaun iha fulan oin mai,”dehan Sekretáriu Estadu iha Salaun SEFOPE Kaikoli, Kinta (02/03).

Governante ne’e hatutan, husi akordu ne'ebé iha jovem sira ne'ebé tuir TIT iha Japaun iha kontratu ba tinan ida to'o tinan tolu.

Nune’e, empregador sira husi Japaun sei mai halo teste ba jovem sira ne’ebé SEFOPE prepara ona iha sentru formasaun SNAE Bekora no iha sentru formasaun sira seluk ne’ebé fó hela formasaun ba jovem sira kona-bá lian Japaun.

Sekretáriu Estadu esplika, jovem sira ne'ebé atu ba servisu iha Japaun sei servisu iha área Agrikultura, Hortikultura, Florestas no Kuidadus saúde ferik katuas sira nian.

"Kriteria ne'e mak, sira hatene Timor nia kultura forte tebes, tan kriteriu Primeiru mak dehan Língua, segundu mak kultura tanba Japaun nia ema se mak idade boot liu hatudu ninia postura hanesan mós ho Timor halo hatudu, agora Kriteria ne'ebé garante ne'e mak saúde, tan nee bainhira Língua ho prestasaun di'ak maibé saúde ladiak ne'e sai mós fator impedimentu ba jovem sira atu labele asesu ba merkadu ida ne'e," dehan Sekretáriu Estadu.

Iha fatin hanesan, Xefe Asosiasaun Dezenvolvimentu Rekursu Humanu Japaun Norte, Kozuo Suzuki, bainhira ko'alia kona-bá Japaun, Japaun ne'e rai boot tebes, tanba ne'e ba faze dahuluk sira sei simu uluk ema na'in sanolu (10).

"Tanba to'o agora kompaña sira seidauk hatene kona-bá Timor-Leste, tan ne'e ami hahú promosaun bá kompaña sira, nune'e ba oin bele aumenta, maibé ami hahú uluk ho na'in 10 depois nia reputasaun di'ak ami aumenta tan," dehan Xefe Asosiasaun.

Nia hatutan, relasiona ho akontesimentu rai nakdoko iha nasaun Myanmar afeita tebes ba sira nia forsa traballu tanba sira presiza  servisu na'in sira atu servisu iha sira nia rai.

Enkuantu, Governu liu SEFOPE haruka ona traballadór timoroan ba servisu iha Japaun, hahú husi tinan 2023to’o 2025 hamutuk na'in 35.