Entre Empreza Publiku (EP) no Institutu Publiku (IP) hirak ne’ebé eziste iha Timor-Leste, so EP ho IP lima (5) mak governu sei la book.
Vise Ministru Asuntu Parlamentar, Aderito Hugo da Costa informa, iha fulan Marsu kotuk, governu hasai tiha ona desizaun kona-ba EP ho IP.
"Iha Konsellu Ministru semana rua liu ba aprova tiha ona, agora iha faze aguarda ba promulgasaun husi Prezidente Republika hodi publika iha jornal republika par lina ministériais ne'ebé tutela ba EP no IP atu re-ajusta akordu ho dekretu lei ne'e," dehan Aderito iha edifisiu Ministeriu Finansas (MF), Aitarak-Laran, Kinta (03/04).
Iha dekretu lei ne’e mensiona buat rua. Ida, halo re-definisaun ba estatutu Empreza Publika no Instituitu Publiku sira, no rua, esklui ka la inklui iha dekretu lei ne’e mak hanesan Autoridade Nasionál Petroleu (ANP); Autoridade Nasional Minerais (ANM); Institutu Geosiensia Timor-Leste, Institutu Publiku; Timor GAP – Timor Gas & Petroleu, Empreza Publiku; no Murak Rai Timor, Empreza Publiku.
"Sira ne'e la inklui katak, estao excluídos no ambitu aplikasaun dekretu lei ne’e. Re-definisaun de'it ba sira seluk, fora husi ne’e. La inklui mak ANM, ANP, Timor Gap, Instituitu Geolojiku, no Murak Rai Timor.”
“Eskluidu ne’e dehan katak, la inklui. Maibé IP no EP sira seluk ne’e kona hotu, atu halakon ka atu sai fali departamentu iha ministeriu ne’e ami iha fulan tolu ne’e atu diskute."
Hatan kona-ba IP no EP ida ne’e, Aderito hatan katak, ida ne’e seidauk detalu maibé tenke halo re-definisaun no re-ajustamentu ba futuru.
“Fora husi ne'ebé mak la kona ne’e mak IP no EP sira tutela iha Ministériu Petroleu no Rekursu Minerais ninian hanesan ANP, ANM, Timor Gap, mais IP no EP sira seluk ne’e tama iha pakote tranzisaun re-definisaun ba futuru," nia afirma.
Aderito hatutan, governu iha tempu fulan tolu atu diskute estatutu EP no IP sira iha lina ministériais sira hotu.
Iha fatin ketak, Prezidente Repúblika, José Ramos Horta hatete, nia seidauk simu proposta lei husi governu atu taka IP no EP.
"Ha'u mak seidauk simu proposta kona-ba taka Institutu Públiku no Empreza Públika sira, ha'u simu karik..," dehan PR Horta, iha Ensinu Báziku Faról, Kinta (03/04).
Molok ne’e, Prezidente Repúblika, José Ramos Horta deklara, bainhira governu aprezenta proposta lei kona-ba taka Empreza Publiku no Institutu Publiku, nu’udar Xefe Estadu nia sei halo kedan promulgasaun.
Xefe Estadu dehan, nia aseita ho hanoin husi Primeiru Ministru, Kay Rala Xanana Gusmão, ne’ebé hakarak taka Empreza Públiku no Institutu Públiku ne’ebé gasta osan arbiru de’it.
Governu, nia dehan, seidauk aprezenta proposta ruma ba nia relasiona ho kestaun ne’e. Maibé se governu aprezenta, nia sei taka matan hodi asina.
"Se governu lori proposta lei mai, ha'u halo kedas promulgasaun, ha'u taka matan tiha depois asina kedas,” dehan Xefe Estadu ne’e ba jornalista sira bainhira partisipa iha eventu Fulan Mundiál Saude Orál, iha Kantina Matak Palásiu Prezidensiál Bairu-Pite, Tersa (25/03).
PR Horta hatete, nia aseita 100% atu taka tiha EP no IP tanba EP no IP iha Timor-Leste barak demais.
"Ha'u konkorda taka IP no EP, tanba Empreza Públika iha rai doben ida ne'e barak demais. Governu sira anteriór, polítiku sira mak inventa tuun-sa'e Institutu Públika no Empreza Públika."
“Institutu Públika iha rai seluk iha, maibé bainhira bolu Institutu Públika ida, Institutu ne'e nia rasik mak hatene halo hatama osan. Tanba hatama osan boot, entaun tenke halo jestaun nu'udar empreza komersiál ida.”
"Ha'u koñese Direitór Empreza Públika balun iha rai li'ur ne'ebá, iha Portugál, ema sira ne'e manan osan tanba sira hatama billaun dollar. Ita nian la'e, nein doit metan ida, eletrisidade sira la hatene kaer. Eletrisidade EP ne'e estraga ema-nia sasan, komputadór, mákina ospitál nian mós estraga," dehan PR Horta.
