Donativu husi Timor-Leste ne’e oferese ba Brazil hodi apoiu dezastre iha nasaun refere ho total orsamentu millaun $4, no rihun $60 oferese ba Reprezentasaun Permanente Repúblika Árabe Saharaui Demokrátika iha Timor-Leste.

"Konsellu Ministrus aprova rezolusaun Governu nian ne’e aprezenta husi Vise Primeiru Ministru no Ministru Kordenador Asuntu Ekonómika reprezenta Primeiru-Ministru, relasiona ho konsesaun donativu ida ba Repúblika Federativa Brazíl, hodi apoia intervensaun tanba inundasaun ne’ebé destroi Estadu Rio Grande Súl ho valór dollar amerikanu millaun $4," informa Konsellu Ministru liu husi komunikadu imprensa ne'ebé INDEPENDENTE asesu, Kuarta (22/05).

Governu manifesta ninia solidariedade no fraternidade ho povu Brazileiru, liu-liu ho populasaun Estadu Rio Grande Súl, ne’ebé akontese udan boot hodi hamosu inundasaun no rai monu, ne’ebé kauza ema na’in 157 mate, na’in 800 kanek, besik na’in 80 mak lakon, no na’in rihun 77 resin evakua ba fatin temporáriu.

“Haree ba situasaun ne’ebé grave no louva kompromisu konstitusionál Repúblika Demokrátika Timor-Leste, Governu aprova apoiu ida ne’e, hodi kontribui ba esforsu autoridade Brazileira ba kriasaun kondisaun sobrevivénsia  ba populasaun afetada no rekonstrusaun ba rejiaun ne’ebé  hetan estragus.”

Aleinde ne'e KM aprova mós projetu Rezolusaun Governu ba atribuisaun donativu ho valór rihun 60 ba Reprezentasaun Permanente Repúblika Árabe Saharaui Demokrátika iha Timor-Leste.

Tuir KM, medida ida ne’e hametin lasu istóriku ne’ebé liga Timor-Leste no Repúblika Árabe Saharaui Demokrátika, bazeia ba dezeju komún hodi luta ba autodeterminasaun, iha prinsípiu solidariedade ba luta povu nian ba libertasaun nasionál no direitu ba autodeterminasaun no independénsia, ne’ebé hatuur iha Konstituisaun Repúblika.

Iha Rezolusaun Parlamentu Nasionál kona-ba solidariedade no apoiu ba povu Saharaui, no iha faktu katak Timor-Leste kontribui husi kedas tinan 2011, ba funsionamentu Reprezentasaun Permanente iha Dili, liuhusi konsesaun subsídiu anuál hodi hala’o sira-nia atividade iha Timor-Leste no iha rejiaun ne’e.