Projetu rezolusaun Governu nian ne'e aprezenta husi Ministru Turizmu Komérsiu no Indústria José Lucas do Carmo da Silva, kona-ba alterasaun dahuluk ba KONFAK, ne'ebé aprova husi Rezolusaun Governu nian númeru 6/2016, loron 17 Fevereiru.
Alterasaun ba Estatutu KONFAK nian ida-ne'e ho ninia objetivu atu hadia, dinamiza no akompaña implementasaun ba prosedimentu sira ne'ebé relasiona ho fasilitasaun komérsiu tuir regra sira husi Organizasaun Mundiál Komérsiu (OMK) no husi Asosiasaun Nasoins Sudeste Aziátiku (ASEAN) nian.
"Konsellu Ministru halo desizaun sira aprova proposta ida husi Ministeriu Turizmu Komérsiu Industria ba iha alterasaun dahuluk ba iha estatutu komisaun nasionál ba fasilitasaun Komérsiu nian KONFAK ida ne'e importante tebtebes tanba ne'e sei fasilita liu tan atividade komersiál nian liu-liu entre Timor-Leste nasaun sira seluk," dehan Ministru Prezidensiá Konsellu Ministru Fidelis Manuel Leite Magalhaes hafoin reuniaun KM iha Palásiu Governu, Kuarta (03/05).
Nia afirma, entaun iha rezolusaun ne'ebé mak aprovadu difine nia membru sira aumezmu tempu mós kria mekanizmu sira ba Ministeriu tolu ne'ebé mak sei koordena serbisu ne'e.
Husi Ministeriu tolu ne'e mak hanesan Ministru Koordenador Assuntu Ekonómiku (MKAE) Ministeriu Finansas (MF) no mós Ministeriu Turizmu Komérsiu Industria hodi haree ba ida ne'e.
Molok loron hirak ba, Governu liu husi Konsellu Ministru (KM) mós rona aprezentasaun sira hodi deside ona atu harii Sekretáriadu Nasionál Adezsun Timor-Leste (TL) nian ba Organizasaun Mundiál Komérsiu (OMK).
Konsellu Ministrus aprova ona projetu Dekretu Governu, ne’e aprezenta husi Ministru Turizmu Komérsiu no Indústria (MTKI) José Lucas do Carmo ne’ebé kria Sekretariadu Nasionál ba Adezaun ba Organizasaun Mundiál Komérsiu nian.
"Konsellu Ministru ohin aprova Projetu Dekretu ne'ebé mak aprezenta husi Ministru turizmu komérsiu Industria ba hodi halo kriasaun ba harii Sekretariu Nasionál ba Adezsun Timor-Leste nian ba organizasaun mundiál komérsiu, Sekretáriadu ida ne'e tanba ita iha faze ne'ebé avansadu iha prosesu adezsun ita nian," dehan Ministru Prezidensiá Konsellu Ministru (MPKM) Fidelis Manuel Leite Magalhaes hafoin reuniaun KM iha Palásiu Governu (27/04).
Tan ne'e mak presiza iha Sekretáriadu ida ne'ebé mak iha Pessoal kualifikadu sira para ajuda kondusaun prosesu ida ne'e nian.
Enkuantu Sekretáriadu ida ne'e nia misaun sei remata bainhira Timor tama ona iha orgazasaun mundiál komérsiu, ida bele dehan karik unidade de misaun serbisu ida.
Objetivu husi Sekretariadu Nasionál ba Adezaun ba Organizasaun Mundiál Komérsiu nian maka atu garante efisiénsia no efikásia ekipa téknika no sustentabilidade serbisu to’o adezaun efetiva país nian ba organizasaun no armonizasaun no adekuasaun sistema nasionál administrasaun no jestaun ekonomia nian ba norma regulamentár no padraun sira Organizasaun nian.
Estrutura proposta, ne’ebé sei depende ba membru Governu ne’ebé responsavel ba área komérsiu no indústria sei dirije husi Koordenadór-Jerál ida no sei inklui profisionál espesializadu iha área prinsipál iha ámbitu adezaun ba Organizasaun Mundiál Komérsiu nian, liuliu, iha asuntu komérsiu internasionál bens no servisu no propriedade intelektuál, no sei kompoin mós husi profisionál sira iha área apoiu tékniku administrativu no finanseiru, no ba monitorizasaun no avaliasaun.
