Prezidente KFP Augustnho Letêncio de Deus hatete, KFP seidauk iha desizaun final atu foti funsionriu públiku ne’ebé idade tama ba reformadu ne’e hahú husi 60 ka 65, maibé desizaun husi Konsellu Minsitru (KM) deside ona 60.
“Ita seidauk iha desizaun ida atu foti husi 60 ka 65, maibé desizaun husi Konsellu Ministru (KM), dehan ona 60, se karik ita kaer ba iha 60 agora ne’e dadaun porvolta de rihun haat (4000), se ba iha 65 entaun iha 2000, entaun totál ne’e defende ba desizaun finál depende ba tinan reforma ne’e iha tinan saida,” dehan Preidente KFP, iha Palasiu Governu, Tersa (25/06).
Lona-ba idade reformadu, nia dehan, Xefe Governu mós kontinua orienta bá KFP atu halo aprezentasaun iha reuniaun Konsellu Ministru (KM) tuir-mai, nune’e bele bá to’o iha konkluzaun finál.
Enkuantu, total funsionáriu Estadu nian iha na’in 36.000, kompostu hosi funsionáriu permanente no ajente administrasaun públika ne’ebe rejistadu iha Sistema Integradu Jestaun Administrasaun Publiku (SIGAP).
IX Governu Konstituisionál liuhusi reuniaun Konsellu Ministru (KM) aprova projetu proposta lei ba autorizasaun lejislativa kona-ba fiksasaun limite idade relasiona ho servisu funsionáriu públiku no ajente administrativu sira.
Ministru Prezidénsia Konsellu Ministrus ein ezersísiu, Vise- Ministru Asunto Parlamentares, Adérito Hugo da Costa hatete, governu nia objetivu ba projetu proposta lei ida-ne'e mak atu Parlamentu Nasionál (PN) autoriza hodi fiksa limite idade ne'ebé fó kauza ba sesasaun relasiona ho serbisu iha Administrasaun Públika.
"Objetivu husi projetu Proposta Lei ida-ne'e atu estabelese mekanizmu nesesáriu sira ne'ebé fó-dalan atu promove profesionál joven sira iha Administrasaun Públika Nasionál, hodi nune'e bele lori kompeténsia foun ba iha funsionalizmu públiku. Renovasaun ba kuadru iha Administrasaun Públika ne'e nu'udar medida esensiál ida atu asegura melloria servisu sira ne'ebé presta ba populasaun," dehan Vise- Ministru iha Palasiu Governu, Kuarta (24/04).
Nia dehan, diskusaun ne'e aprezenta husi Ministeriu Presidensiál Konsellu Ministru (MPCM) ho prezensa husi Komisáriu Komisaun Funsaun Públiku (KFP) tanba ema hotu hatene KFN nia mandatu atu halo mudansa kona-ba kuadrus legais iha Administrasaun Públika nia laran.
"Iha aprezentasaun ida ohin hodi fiksa idade fiksu idade 60 ba reforma obrigatóriu ita hotu hatene rejime ne'ebé eziste durante tinan barak nia laran ne’e la’os obrigatóriu durante ne’e hala’o sira-nia servisu hela iha la rekere nia direitu atu reforma," dehan Vise Ministru.
Akresenta tan katak, KFP aprezenta ho detalla tebes razoesn hotu-hotu ho intensaun ida katak atu fó espasu ba rekrutamentu foun sira funsionáriu públiku atu dedika sira-nia servisu iha administrasaun públiku estadu nian. Enkuantu, proposta lei ne'e aprova ona iha KM maibe sei halo submensaun ba Parlamemtu Nasional depois pronúnsia autoriza ka lae tanba ne'e kompeténsia PN nian.
