Tuir dadus husi OMS nasaun sira ne'ebé ho númeru kazu Covid-19 aas liu mak, Xina ho kazu konfirmadu hamutuk 80.924 ne'ebé hamate ona ema na'in 3.140; Italia ho kazu konfirmadu 9.172 no na’in 463 mate; Koreia ho kazu konfirmadu 7.513 no na’in 54 mate; no Iraun ho kazu konfirmadu 7.161 no ema na’in 237 mak mate ona.
Entretantu, husi total kazu Covid-19 ne'ebé konfirmadu husi nasaun 109, ema na'in 4.012 mak mate ona.
Rezolusaun Governu
Ho ameasa real husi Covid-19 ne'e, governu Timor Leste aprova ona rezolusaun ida hodi estende temporaria sidadaun husi nasaun tolu hanesan Xina, Italia no Iraun atu labele tama iha Timor Leste.
"Rezolusaun ne'e propoin bolu medida temporariu interdisaun rezissaun entrada mai Timor Leste husi rai Republika Popular Xina, Republika Italia no Republika Islamika Iraun ne'ebé ohin loron corona virus afeita makas tebtebes," dehan Ministru Prezidente Konselu Ministru Hermegildo Augusto Pereira Cabral iha Palasiu Governu, Kuarta (11/03).
Ministru ne'e hatutan, propagasaun ba Covid-19 la'o lalais tebes, nune'e medida kona-ba interdisaun ne'ebé define iha termu rezolusaun ne'e sei reapresia fali kuinzalmente hodi haree ninia manutensaun ka eliminasaun.
Liu husi rezolusaun ne'e, nia dehan, fó ona orden ba ministeriu saude atu fó fila-fali orientasaun serbisu kompetente ministeriu saude nian hodi kordena ho lina ministerial relevante sira atu haktuir ba protokolu ne'ebé estabelese ona husi OMS.
