Daudaun ne’e instituisaun PNTL hetan priviléjiu boot ho ninia mobilizasaun servisu ne'ebé komandu orienta ba ninia unidade sira hodi halo vizibilidade iha oras 24 atu asegura seguransa iha territóriu TL.
Komisáriu Polisia Júlio da Costa Hornai konsidera akontesimentu ne’e hamonu duni imajen PNTL. Maibé, komandu mós sei foti medida forte hasoru sira (JPA no FMS).
“Ha’u sente duni akontesimentu ne’e duni impaktu negativu ba imajen PNTL nian”, dehan nia, iha servisu fatin, horisehik.
Nia hatutan, instituisaun iha ninia regra ne'ebé forte atu aperta indiviu sira ne'ebé tenta viola no koko atu estraga prestíjiu instituisaun PNTL.
Hornai afirma, prestíjiu instituisaun ne’e aas iha leten. Se de’it mak sai membru PNTL tenke asegura no kumpre para bele tane nafatin nu'udar instituisaun estadu no povu nian.
Tanba ne’e, lei fó kompeténsia mai komandu hodi foti medida hasoru sira na’in rua ne'ebé komete ona kazu brutalismu ne’e.
Medida kautelar, dezarmamentu, suspensaun preventiva hodi submete para afasta sira husi servisu hotu. Portantu bele ameasa mós ba suspensaun. Tan ne’e komandu sei foti medida forte ba infrasaun ne'ebé sira komete.
Entretantu, Alberto Ximenes, aman husi Matebian Leonardo Eduardo Ximenes, la simu realidade moruk ne’e. Kondena hahalok pesoál polisia na’in rua nian tanba tuir loloos polisia labele halo atuasaun hanesan ne’e.
“Ha’u la simu! Ha’u husu ba komandu atu foti medida rigorozu para prosesa oknum polisia na’in rua ne’e”, tenik nia ho tanis, iha Mortuariu HNGV, horisehik.
Iha sorin seluk, Bobby Gonçalves, tiu husi matebian Luis Gevin Saldanha hateten, prosesu ne’e tenke la'o ba oin. Polisia uza arma la'ós atu tiru fali povu ki’ik.
Nia dehan, arma ne’e kuandu membru ida atu uza tenke hatene uluk ameasa ba ninia vida ne’e to’o iha ne'ebé ona. Komandante sira tenke estuda didi'ak profisionalizmu membru sira nian molok atu entrega arma.
“Ha’u sujere tenke haree lai profisionalizmu membru ne’e nian bele ona ka lae atu uza sasán sira ne’e molok entrega ba sira”, tenik nia.
Membru Polisia iha Unidade Espesiál ne’e la simu atuasaun kolega na’in rua nian, ne'ebé halo ema na’in ualu sai vítima.
