Ministru Prezidensiál no Konsellu Ministru (PKM), Hermenegildo ‘Agio’ Pereira hatete, Konsellu Ministru estraordináriu ne'ebé aprova hodi hatún rezolusaun ne'ebé aprezenta husi eis-Vise Ministru Negósiu Estranjeiru no Kooperasaun (MNEK), Roberto Sarmento de Oliveira Soares, kona-ba planu diskusaun fronteira tasi no rai maran entre TL ho Indonézia ne'ebé tempu badak atu hahú.

Ne'e duni, desizaun konsellu Ministru aprova rezolusaun ne'e hodi fó konfiansa espesiál ba Xanana Gusmão hamutuk ninia ekipa diskute baliza tasi no rai maran entre TL ho Indonézia.

"Governu Nomeia maun boot Xanana Gusmão hanesan reprezentante espesiál atu kontinua diskute fronteira rai maran ho Indonézia," Dehan Agio Pereira iha Palásiu Governu Dili, sesta (23/11)

Ne'e duni, Iha konsellu Ministru delega Eis-Vise MNEK Roberto Sarmento de Oliveira Soares hanesan Xefe ba Ekipa Negosiasaun Tékniku hodi diskute ho Indonézia kona-ba fronteira rai maran entre Timor ho Indonézia.

Entretantu Xefe Negosiadór Tékniku, Roberto Sarmento de Oliveira Soares hatete, onra boot tanba Governu fó konfiansa atu lidera diskusaun fronteira rai maran ho tasi entre Timor Leste ho Indonézia.

Nia dehan, iha diskusaun ne'e pontu rua mak sei diskute iha Oekusi iha rai Naktuka ho Pásabe nian.

Nune'e, iha akordu ne'ebé Governu rai rua ne'e altura ne'ebá fiskalizasaun no halo analiza hodi sukat fronteira iha Oekusi ne'ebé hetan konfuzaun.

Ne'e duni, Timor Leste ho Indonézia iha ona kometimentu hahú diskusaun ba fronteira marítima ne'ebé ne'ebé komplikadu hela.

Tanba ne'e, ekipa Timor-Leste ho Indonézia sei hahú diskute tékniku asuntu iha inisiu Dezembru, hodi aselera lalais prosesu negosiasaun Fronteira Marítima ho rai maran entre Timor Leste ho Indonézia.

Tanba ne'e, planu Governu Timor-Leste aselera lalais prosesu negosiasaun fronteira rai maran ho tasi nune'e hametin Kooperasaun bilaterál rai rua nian, hodi fó benefísiu ba komunidade iha área fronteira Timor Leste ho Austrália.