Arguidu na’in rua ne'e kondena ho artigu 114 alinea (2), artigu 113 alinea (1), UU RI númeru 35, tinan 2009 kona-ba Narkotika.

Juntu artigu 55 KUHP alinea (1) ba-1, tanba tenta lori ai-moruk droga tama Fronteira Mota-ain Atambua-Indonézia ho totál ai-moruk musan 4.874 ne’ebé Autoridade Seguransa (Beacukai) halo apreensaun (foti) iha mákina Epson mutin nia laran iha loron (29/5/2019).

Liu husi reportajen direita husi jornalista diariu emprime no Online INDEPENDENTE, Martinha Gusmão katak, Tribunál deside aplika pena prizaun tinan lima no selu multa billaun ida rupiah ba arguida Angela Soares, no tinan 10 ba arguidu José Perreira tanba arguidu no arguida prienxe duni elementu krime ne’ebé Ministériu Públiku akuza.

Maibé iha kazu ne’e tribunál deside tuir ninia konviksaun no tetu sirkuntansia sira, tribunál tetu durante iha prodaun provas, arguida no arguidu kolabora tebes ho justisa, no alende ne’e arguidu nuudar inan ida.

Tribunál konsidera arguida angela prienxe elementu krime ne’e tanba iha produsaun provas arguida deklara, arguida deside tuir arguidu ba kupang ho razaun atu sosa kadeli no tanba Arguidu José foin primeira ba Kupang, arguida tauk orsida sasán la to’o iha fatin destinasaun.

Ho deklarasaun ne’e Tribunál tetu arguida iha potensia prienxe elementu fasilita sasán ne’e bele to’o iha fatin destinasaun.

Enkuantu Tribunál konsidera arguidu prienxe elementu krime ne’e, tanba arguidu servisu iha iha Kompañia JVS Internasionál ne’ebé hala’o servisu espedisaun nian.

Maibé bele halo fali servisu lori sasan, tuir Tribunál katak tuir loloos sasan ne’e bele lori liu husi expedisaun, maibé fo fali ba arguida maka lori, Tribunál hanoin ne’e la razoavel.

Husi sirkutansia ne’e Tribunál deside pena prizaun hirak ne’e ba arguida no arguidu, no Tribunál konsidera pena prizaun ne’e hanesan pena edukativu ba arguidu no arguida atu nune’e iha futuru mai la bele repete tan erru ne’e.

Jeremias Kase hanesan defeza arguidu nian ne’e simu desizaun Tribunál ne’e, maibé iha tempu loron hitu ne’e sei hein desizaun atu halo rekursu ou lae.

“Agora tempu loron hitu ne’e ita sente katak presiza atu rekursu, entaun ha'u hanesan defeza ha'u sei halo rekursu,”nia dehan, iha Tribunál distrital atambua, Kuarta (26/02).

Tuir observasaun diariu INDEPENDENTE iha Tribunál Atambua katak prosesu julgamentu lao di’ak. Audensia julgamentu ne’e preside husi juis kolektivu AA Gede Susila, Gustav Bless Kupa, Sisera S.N. Nenohayfeto, Ministeriu publiku reprezenta husi Andi P. Wicaksono.