Komandante Jerál Polísia Nasionál Timor-Leste, Komisáriu Faustino da Costa hatete, kazu sunu uma iha suku Nunira iha ligasaun ho kazu tentativa omesidu hasoru Leonel Freitas iha Vila Nova, Baukau villa.
“Ami identifika ona ema balun, tanba kazu Vila Nova, Baukau, ninia tentativa omesídiu ne’e suspeitu iha polísia nia liman ona, no kazu sunu uma iha suku Nunira ami halo identifikasaun ba ema na’in neen,” dehan Komisariu Faustino foin lalais.
Kona-ba kazu sunu uma, Faustino dehan, bazeia ba relatóriu investigasaun PNTL populasaun sira-nia uma ne’ebé hetan sunu lima (5), dapur 11, motor ida, no na’in rua kanek, inklui karreta ida rahun.
Nia hatete, kazu hirak ne’e envolve grupu Arte Marsiál ne’ebé Governu reativa, tan ne’e PNTL sei la tolera kualkér grupu Arte Marsiál ne’ebé uza atributu organizasaun nian hamosu problema hodi halo povu kbiit laek sira sai vítima.
Tenke Kombate Grupu Organizadu
Entretantu, membru komisaun B trata asuntu Negósius Estranjeiru, Defeza no Seguransa, David Dias Ximenes “Mandati” husu ba PNTL atu kombate grupu organizadu ne’ebé kontinua hatudu hahalok brutalizmu hodi estraga no sunu komunidade nia uma no sasan iha postu Administrativu Laga, Munisipiu Baukau.
“Parte seguransa, liu-liu ba komandu polisia Baukau, tenke identifika ona grupu ne’ebé halo fali dezorden públiku ida ne’e,” dehan Mandati, iha PN, Sesta (14/08).
Nia husu mós ba governu atu tenke halo resensiamentu ba grupu arte marsiais sira no halo kontrolu ba fatin sira ne’ebé arte-marsiais sira halo treinamentu.
