Ministru Obras Publika, Samuel Marçal hatete, MOP hein atu hatan bainhira Diretor Eskola São Miguel levanta kazu ne'e ba Tribunál.

"Konforme Diretor Eskola São Miguel, ida ne’e nia direitu, ne’e duni se iha problema ruma karik Justisa bolu ita ba hatan," dehan Samuel Marçal ba Jornalista sira iha Palasio Governu, (06/02).

Nia dehan, problema ne'e desde iha tinan 2018, tanba komunidade sira ne'ebe hetan afeta ba projetu haluan estrada protokolu husi Tasi-Tolu mai to'o Rotunda Komoro sai hotu ona no agora hela de'it Eskola São Miguel.

Nia esplika, iha ukun Governu anterior bolu ona Diretor Eskola dala barak, maibé Diretor eskola dala-ruma konkorda no dala-ruma la konkorda.

" Tempu badak sei iha seremonia ida Tasi-Tolu (Amo Papa Vizita TL), entaun ita labele hein tempu,ita tenke duni tempu fulan lima (5) de'it tenke konklui estrada," tenik nia.

"Orsamentu (indemizasaun) ita mantein nafatin, se ita selu nia simu pagamentu problema saida,mais sira informa dehan Diretor Eskola konkorda ona, ha'u mós kontente agradese tanba  Diretor kolabora ona entaun konstrusaun estrada ne'e bele la’o ona," tenik nia.

Orsamentu ne'ebé governu sei halo indemizasaun ba Eskola São Miguel Arcanjo hamutuk rihun $360.

Molok ne'e, Diretó Eskola são Miguel, Armindo Crisna Caetano la konkorda ho desizaun governu ne'ebe sobu sem koñesimentu tanba seidauk halo indemizasaun.

"Sira mai sobu laiha karta koñesimentu ruma hodi ami bele prepara kondisaun. Ha'u ko'alia ona ho Advogadu, karik asaun ida sira mai sobu ne'e krime, ita bele kriminaliza sira,la buat ida sira sobu,sira nia fatin mak iha Tribunál," dehan nia.