Tuir dadus husi Depertamentu Vijilansia Epidemolojia, Ministériu Saúde, to’o iha 12 Fevereiru, kazu dengue ne’ebé rejista hamutuk 1.998.
Husi númeru ne’e, kazu barak liu rejistu iha munisipiu Dili ho kazu 1.285, Manatutu ho kazu 132, Ermera ho kazu 85, Baukau ho kazu 82, Manufahi ho kazu 82, Kovalima ho kazu 68, Lautem ho kazu 63, Likisa ho kazu 51, Aileu ho kazu 46, Vikeke ho kazu 44, Bobonaru ho kazu 30, Ainaru ho kazu 27 no RAEOA ho kazu 3.
“Husi dadus ne’e hatudu kazu dengue espalla ona iha teritoriu Timor-Leste tomak no kazu mate espalla ona iha munisipiu 9, ne’ebé kazu hamutuk 30,” informa MS liu husi Komunikandu Imprensa ne’ebé Jornal INDEPENDENTE asesu, Domingu (13/02).
Munispiu 9 ne’ebé rejista ona kazu mate mak Dili ho kazu 16, Ermera ho kazu 4, Kovalima ho kazu 3, Aileu ho kazu 2, Ainaru ho kazu 1, Baukau ho kazu 1, Manatutu ho kazu 1, Manufahi ho kazu 1 no Vikeke ho kazu 1.
Ba kazu ne’ebé rejista iha kapital Dili, tuir dadus husi MS, Postu Administrativu Dom Aleixo rejista kazu as liu ho kazu 680, Kristu Rei ho kazu 276, Na’i Feto ho kazu 151 no Vera Kruz ho kazu 142.
“Husi kazu ne’e hatudu kada loron kontinua sa’e maka’as iha Dili laran, nune’e loron ba loron kazu sei espalla nafatin ba iha postu sira seluk,” informa MS.
Ho ida ne’e, MS kontinua husu ba públiku atu aprezenta aan iha fasilidade saúde sira ne’ebé besik bainhria sente isin-manas ka laran sa’e, liman no ain sikun moras, atu bele hetan atendimentu husi médiku sira.
“Husu mós ba autoridade munispiu inklui lokais atu bele orienta komunidade hala’o limpeza jeral iha idaidak nia suku inklui aldei tomak, fase tanke, bidon ka balde semana ida dala ida, limpeza roda aat sira, vazu aifunan atu susuk labele natolun,” apela MS.
