“Númeru kazu detetadu foun 75 (taxa pozitividade: 5.7), rekuperadu na’in 45 no óbitu na’in ida,”dehan nia iha komunukadu neebé Online INDEPENDENTE, asesu domingo nee.

Ho nunee, munisipiu ida laiha ona kazu ativu no  munisípiu 10 ho RAEOA sei iha kazu esporádiku no Kapitál Dili ho transmisaun komunitária.

Enkuantu, total kazu ativu neebé iha sala izolamentu hamutuk na’in 1.445.

Total komulativu kazu konfirmadu sura husi loron 21 marsu 2020 too 13 fevereiru 2022 hamutuk 21.631 no total komulativu óbitu hamutuk na’in 124.

Entretantu, ba kazu mate, Ministeriu Saúde relata, sidadaun mane ho idade 78, hela iha Kapital Dili no seidauk simu vasina.

Kazu refere tama izolamentu Lahane iha loron 8 fevereiru 2022 ho DX: Covid-19(CT 20,6) + TEP.

“Nunee, pasiente refere, hakotu iis ohin (13/02) dader tuku 11:25 otl,”haktuir komunikadu.

Enkuantu, kobertura vasina kompletu (doze 2) iha teritoriu laran tomak atinji ona pursentu 71,2 (71,2%).

Iha oras 24 nia laran, teste PCR ne'ebé Laboratóriu Nasionál Saúde halo hamutuk 266, kompostu husi, vijilánsia sentinela na’in ida, rastreiu ba kontaktu 77, rastreiu aleatóriu 105, viájen internasional 78 no follow up iha kuarentena hamutuk na’in 5.

Aleinde, teste PCR neebé halo iha 12 fevereiru 2022, iha munisipiu sira seluk, RAEOA no HNGV hamutuk 103.

Haree ba kazu neebé kada loron aumenta, Ministeriu Saúde husu ba populasaun sira atu nafatin kontinua mantein medidas prevensaun sira, relasiona ho variante foun omicron neebé agora dadaun rejista ona iha nasaun viziñu sira.