Dom Virgilio Kardeál do Carmo hatete, hanesan resposanvél uma Kreda Katólika iha Timor-Leste husu ba sarani Timoroan hotu reza ba Amu Papa Francisco hodi hetan tulun husi na’in Maromak bele rekopera nia saúde tuir ema hotu nia hakarak.

“Ha'u husu ita kontinua reza ba Amu Papa Francisco, atu ho na’in Maromak nia tulun, nia bele rekopera nia saúde ho di'ak, ita sei akompaña nafatin," dehan Kardeál ba jornalista sira, hafoin remata misa agradesimentu ba loron FALINTIL iha Igreja Santa Terezina Meninu Jesus Ossú, Munisipiu Vikeke, domingo ne’e (23/02).

Kardeál hatutan, informasaun ne'ebé doutor sira akompaña relata katak, Amu Papa Francisco kontinua baixa iha ospital no iha sinal di'ak ba prosesu rekopera saúde, maibé doutor sira informa presiza baixa tan.

Nune’e, Sarani Katólika Timor-Leste presiza halo orasaun atu Santo Papa bele rekopera saúde tuir ema hotu nia hakarak.

Dom Virgilio haktuir tan katak, Amu Papa Francisco sofre moras respiratoriu liga ho pulmaun, tanba situasaun dadaun ne'e iha Itália rai malirin, depois Papa ne'ebé foin kompleta idade 88, ho ida ne'e tempu rai malirin provoka ba nia respiratoriu moras pulmaun.

“Tuir ha'u hatene, Amu Papa Francisco baixa kedas iha sesta semana kotuk, agora halo ona semana ida, kontinua halo tratamentu saúde iha Ospital Jemelli Vatinaku, tanba sofre moras respiratoriu pulmaun, entaun ita hotu nafatin halo orasaun para bele rekopera tuir ita hotu nia hakarak,”haktuir Lider Igreja Katólika Timor-Leste.

Entretantu, tuir informasaun ne'ebé atualiza husi observatoriu romanu vatinaku iha loron 23 fulan-Fevereiru, dader, Santo Papa kontinua baixa iha óspital, seida’uk sai husi perigu, maibé iha sinal di'ak ba prosesu rekoperasaun saúde.