Minístru Edukasaun Interinu, atuál Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál, Domingos Lemos Lopes hatete, teste eletróniku iha fase daruak husi konkursu bolsa kandidatu nian ho objetivu atu priense vaga 2.400 ba lista, espera husi profesór husi edukasaun pré-eskolar to'o terseiru siklu.
Nia hatutan, lista profesór ne'e sei uza hodi priense vagas kuadru pesoál ne'ebé kada eskola ensinu básiku presiza. Ne'e hanesan marka importante iha komprimisu kontinua ho edukasaun no dezenvolvimentu kualidade profesór nian.
Governante ne’e esplika, fase primeiru husi konkursu iha númeru boot kandidatu ne'ebé inskritu, maibé númeru ki'ik kandidatu ne'ebé hetan pontu mínimu 60, tuir Lei KFP nian atu okupa vaga ne'ebé disponível husi lista espera husi Diresaun Rekursu Umanu ME nian.
Tanba ne'e, sei oferese oportunidade foun ba kandidatu 7.567 ne'ebé halo inskrisaun iha faze daruak konkursu bolsa kandidatu nian.
“Nune'e, hau espera katak kandidatu hotu preparadu no trankuilu atu halo teste eletróniku ho seguransa no konfiansa tomak. Ne'e hanesan momentu atu sira hatudu sira-nia dedikasaun, koñesimentu no vokasaun ba ensinu,” dehan Sekretáriu Estadu iha salau Aikurus KFP Matadoru, Sesta (28/06).
Minístru interinu salienta, konkursu ne’e la’ós atu fó oportunidade ba ema, maibé atu lorin vida estudante nian ba futuru eduakasaun TL nian.
“Ha'u fiar katak kada kandidatu ida-ne'e prepara ona atu hetan pontu mínimu no hetan iha lista espera profesór nian. Ne'e hanesan ita-nia momentu, entaun tenke uza liman rua ba kaer oportunidade ne'e,” dehan Ministru Interinu.
Prezidente KFP, Augustinho Letêncio de Deus, hatete, atu sai manorin ne’e la’os oportunidade maibé ne’e vokasaun, tan ne’e KFP hamutuk ho ME aposta ba iha teste elektróniku atu hili timoroan ne’ebé kualidade hodi hanorin jerasaun futuru nasaun nian.
“Profesor sira ne’e la’os oportunidade maibé ne’e vokasaun, la’os ema hotu-hotu bele sai profesor maibé entre ema-na‘in 10 dalaruma na’in-lima prontu atu sai profesor tanba ne’e hanorin futuru jerasau nasaun nian, tan ne’e Komisaun Funsaun Publika ho Ministeriu Edukasaun atu aposta de’it ba prosesu selesaun liu husi teste elektróniku,” katak prezidente KFP.
Enkuantu, teste ne’e sei realiza durante loron 14 nia laran, hahú husi loron 28 fulan Juñu to’o loron sanolu resin lima fulan-Jullu tinan 2024.