Liu husi sira-nia públikasaun iha pajina facebook ‘Pedronov Loivacho Nelukana Vieira’ iha 15 Maiu 2021 hatete katak iha ona voluntariu lubuk ida ne’ebé prontu lori ‘Lamukan’ kompete ho kandidatu sira seluk iha eleisaun prezidensial tinan oin.

“Movimento Revoluçionario pronto. Iha ona voluntariu lubuk ida mak prontu ona lori kompañeiru Lamukan atu kompete ho kandidatu seluk,” Pedronov hakerek iha ninia varanda facebook ho imajen kandidatu ne’ebé sira apoiu. Iha imanjen ne’e hakerek “Virgilio ‘Lamukan’ Guterres. Kandidatu Prezidente RDTL 2022-2027.”

Hafoin públikasaun ne’e, utulizadór facebook lubuk ida mak fahe no hato’o sira-nia apoiu tomak ba Virgilio. Enkuantu, Virgilio rasik sei nonook.

Iha intervista ho membru senior Rezisténsia Nasionál Estudante Timor-Leste (RENETIL) Pedrito Vieira ne’ebé lansa kandidatura Virgilio Lamukan iha media sosial, iha 16 Maiu 2021, hatete, nia seidauk koalia ho Lamukan kona-ba asuntu refere.

Maibé tuir nia, iha nasaun demokratika ema idaidak iha direitu atu espresa sira-nia hanoin hodi fó apoiu ba sidadaun see de’it atu kandidatu ba Prezidente Repúblika.

“Ha’u seidauk ko’alia ida ne’e kompaneiru Gil (Virgilio) maibé ami koñese di’ak, tanba nia ema iha esperensia no kapasidade diplomasia ne’ebé di’ak,” dehan nia via telefone.

Atuál Koordenadór Organizasaun Nasionál Rede ba Rai ne’e dehan, Virgilio hatudu ona matenek no kapasidade diplomasia durante tempu rezisténsia.

“Ha’u hanoin membru RENETIL barak mak sei apoiu Lamukan, problema mak membru namkari iha idaidak nia partidu, Gil ita bele dehan nia tama iha kategória Independente,” nia hatete.

Hafoin nonook durante fulan ida resin, iha 27 Juñu 2021, Virgilio liu husi ninia pajina facebook ho naran ‘Gill Bolale’ deklara simu ‘proposta’ husi Movimentu Revolusionariu.

“Movimento Revolucionário, ha’u mak ne’e! Mai ita la’o hamutuk! Hamutuk lori ukun atu serbi povu (Poder ao service do povo)! Labele husik povu sai atan ba poder! Ukun atu serbi,” deklara Lamukan iha nia varanda facebook ne’ebé jornal INDEPENDENTE sita iha Segunda (28/06).

Resposta husi Virgilio ne’e hetan reasaun pozitivu husi utilizadór media sosial sira hodi fahe tutan no hato’o sira-ninia votus konfiansa.

Utilizadora facebook ho naran Bella Galhos fó ninia apoiu tomak tanba konsidera Virgilio iha kapasidade no brani atu hatete ‘lae’ ba buat ne’ebé sala.

“Tempu ona lori Timor ba oin ho lideransa foun, suporta maun Gill Bolale. Maun Gil beibeik fanun, bolu atensaun ba maun boot sira ho ninia dalan hakerek no koalia buat ne’ebé loos.”

“Ita hakarak Timor ba duni oin mak ita hapara hirak ne’ebé so bele dehan ‘sim’ mesmo sala.”

“Maun Gill brani dehan ‘lae’ ho razaun no sujestaun iha oin no iha asaun,” Bella hakerek iha nia varanda facebook.

Iha utilizadór seluk ne’ebé liga kandidatu Virgilio ho kandidatu husi partidu KHUNTO Armanda Berta dos Santos.

Tuir utilizador facebook ho naran Caetano Alves la presiza atu kestiona ka kritika Armanda Berta ne’ebé sai kandatu ba Prezidente Repúblika, tanba nu’udar nasaun demokratiku sidadaun Timor-Leste hotu-hotu iha direitu atu kandidata an.

Maibé, bainhira haree katak Armanda laiha kapasidade di’ak liu hili Virgilio ne’ebé nu’udar kandidatura husi jerasaun foun.

“Iha nasaun demokratiku ida, ita la presiza preokupa ka kritika mana Berta ninia kandidatura ba Prezidente Repúblika periodu 2022-2027. Se ita haree mana Berta ninia kandidatura la tuir ita-nia rekezitu, ita la presiza kesiona ka kritika ho taka matan.”

“Simples liu mak hili ita-nia kandidatura rasik hanesan jerasaun foun Virgilio da Silva Guterres “Lamukan” ne’ebé ho figura simplesidade no vizionariu atu serbi.”

“Mai ita hamutuk hodi apoiu ninia kandidatura ba Prezidente Repúblika periodu 2022-2027,” dehan Caetano.