Xefe Departamentu Forensik Hospital Nasionál Guidu Valadares (HNGV), Nilton Tilman hatete, nia parte bele halo autópsia maibé defisil atu halo autopsia ba ema ne’ebé deskonfia mate tanba vasina, tanba HNGV sei menus rekursu, fasilidade no seguransa ba pesoál saúde atu halo autópsia.

Tuir nia, atu halo autopsia ba kazu ema ne’ebé deskonfia mate tanba vasina la’os de’it kestaun fasilidade no rekursu, maibé liga mós ba lei.

Maske Xefe Departamentu ne’e la esplika klaru kona-ba lei saida, maibé nia hatete de’it katak atu halo autopsia refere presiza mós atu halo alterasaun ba lei.

“Maibé buat hotu atu realiza iha tempu badak ne’e la fasil hanesan ho saída mak ema hotu espera,” dehan nia iha nia knar fatin, HNGV, Segunda (28/06).

Tan ne’e, nia sujere ba ema hotu katak, bainhira ema mate deskonfia tanba vasina di’ak liu labele dada-malu atu ba halo autópsia, tanba sei la garante atu rezolve problema. 

Iha fatin ketak, Deputada Bankada CNRT, Virgínia Ana Belo husu MS atu esplika ba sidadaun sira kona-ba efeitu husi vasina AstraZeneca.

“Impaktu husi vasina AstraZeneca ne’ebé mak ita-nia maluk balun, ita lakohi no takan matan katak iha duni impaktu balun, Sasán sira ne’ebé ké pudia ser Ministériu relevante esplika ba públiku antes obriga populasaun ba vasina,” dehan nia iha PN, Segunda (28/06).

Molok ne’e, Komunidade ida ne’ebé durante ne’e hela iha Tasi Tolu lakon nia vida hafoin simu vasinasaun vasina astrazeneca doze dahuluk. Familia deskonfia vasinasaun sai kauza prinsipal.

Iha 20 Maiu 2021, Agel Bin Ali ho idade tinan 56 deside hakat ba kapela Maslidun, Tasi-Tolu, hodi simu vasinasaun ne’ebé profisional saúde sira oferese iha kapela refere.

Hafoin tuir prosesu ne’ebé iha, Agel oferese an ba pesoal saúde sira atu sona vasina astrazeneca ba nia isin-lolon. Nia simu kartaun kinur ne’ebé hakerek kona-ba informasaun balun no mós data vasinasaun doze daruak ne’ebé monu iha 15 Jullu 2021.

Maibé, iha 25 Maiu, hafoin loron lima simu vasinasaun, Agel hahú sente buat balun sala iha nia isin-lolon. Agel sente nia ain maten.

“Hafoin loron lima (simu vasinasaun) matebian sente nia ain parte karuk maten,” informa reprezentante familia matebian, Junior Alves, iha bainhira akompaña mate-isin ba musola, Markoni, hodi fó haris ba mate-isin no hasa’e orasaun bazeia ba fiar musulmanu nian molok lori mate-isin ba Natarbora, Manatuto atu haloot, Sabadu (26/06).

Ho moras ne’e, familia esforsu hodi halo de’it tratamentu iha uma ho aimoruk tradisional.

Maibé, husi loron ba loron, Agel nia kondisaun aumenta la di’ak. Nune’e iha 14 Juñu familia deside lori ba HNGV hodi halo tratamentu saúde.

Iha ospital, Junior hatete, fofoun mediku sira halo teste ba matebian no deklara katak matebian sofre moras kista, maibé ikus mai deteta fali buat mutin kiik barak iha matebian nia isin laran.

“Entaun husi médiku sira hato’o persiza halo fali estudu ida tan, maibé oan sira la hatene loloos matebian nia moras ne’e maka saída to’o matebian nia iis kotu,” dehan nia.

Matebian konsege baixa iha HNGV durante loron 12 no iha 26 Juñu madrugada matebian nia iis kotu.

Tuir familia, durante ne’e matebian la sofre moras kroniku ruma, tan ne’e bainhira matebian hato’o ninia hakarak atu simu vasinasaun, familia hotu-hotu konkorda.

Maibé, hafoin simu vasinasaun, matebian hahú sofre moras no ikus mai lakon vida.

Tan ne’e, familia deskonfia vasinasaun mak sai kauza prinsipal husi matebian nia mate.

“Depois simu vasina mak matebian hetan moras, ba baixa to’o matebian husik iis, maibé ospital la klarfika loloos katak matebian ne’e mate tanba vasina ka mate ho moras seluk,” dehan Junior.

Tan ne’e, familia husu ba parte HNGV atu klarifika loloos bazeia ba teste ne’ebé sira halo ona kona-ba kauza husi matebian nia mate.