Jurista Alexandre Corte Real hatete, akuzasaun husi Ministériu Públiku fraku ka juis koletivu sira mak la analiza didi’ak ba prosesu sira ne’e molok foti desizaun.

“Faktu sira ne’e bazeia ba provas, kuandu laiha provas bele absolve. Ita mós labele observa de’it kuandu Antonio da Conceição iha primeira instansia halo rekursu, nia bele manan iha Tribunál Rekursu,” dehan nia. 

Jurista seluk, Fernando Carvalho hatete, bainhira Tribunál Rekursu deside absolve arguidu ka kondenadu ruma, signifika katak laiha provas ruma ne’ebé naton atu kondena arguidu ne’e sala.

“Haree katak desizaun primeira instansia hatun ne’e la bezeia ba provas, ho lia seluk ida katak dezisaun primeira instansia nian ne’e sala,  ne’e duni Tribunál Rekursu revoga tiha desizaun ida ne’e hodi absolve total ba pena ne’ebé antes ne’e aplika,” Fernando dehan ba jornalista sira, iha Tribunál Dili, Segunda (15/04).

Maske nune’e, tuir nia, desizaun TR ne’e la hafraku servisu juiz sira iha Tribunál Primeira Instansia.

“Tanba lei mak hanesan ne’e duni, iha Primeira Instansia no Segunda Instansia. Desizaun Segundu nian ne’e atu kontrola desizaun Primeira Instansia.”

“Bainhira kuandu iha erru ruma, Tribunál Rekursu iha nia dever atu haree no bele hadia, tanba ne’e ha’u sente laos hafraku desizaun juiz (primeira instansia) sira nian,” dehan nia.