Portavoz Ekipa Integradu Ministériu Saúde, Vidal de Jesus Lopes hatete, aimoruk la’ós laiha maibé stock mak menus.
“Agora daudaun ita-nia númeru stock out aumenta uitoan ba INFPM 28% no iha HNGV 17%,” dehan Vidal iha HNGV, Segunda (15/04).
Nia hatutan, aimoruk iha INFPM stock out beibeik tanba sira sustenta ba fasilidade saúde sira iha Timor-Leste laran tomak.
“Tanba demanda barak demais ho nune’e ai-moruk nafatin stock out,” Vidal hatutan.
Tuir informasaun ne’ebé portavos ne’e hetan, iha inisiu fulan Maiu aimoruk item 147 ne’ebé INFPM sosa sei tama. Enkuantu husi kompania Sali-Magu item 530 kompostu husi aimoruk, konsumaveis, no reajente.
“INFPM rasik mós halo ona kompras 147 item. Husi aimoruk 147 item ne’e, tuir lista esensial ne’e 405 ne’ebé HNGV hatama ba INFPM, tanba ne’e ida ne’ebé HNGV hatama ne’e kompras annual no nia kuantifikasaun no espesifikasaun ne’ebé hatama ne’e sira sosa tuir ida ne’e,” dehan nia.
