Iha loron sesta (3/4), Presidente Repúblika Fransisco Guterrres Lú Olo aseita pedidu Primeiru Ministru Taur Matan Ruak hodi ezonera Vise-Ministra Saúde Élia Antonia Dos Reis Amaral ho rajaun indisiplinar.

Hafoin desizaun ezonerasaun, mosu kedas ho informasaun ne'ebe espailla iha media sosial katak, Koligasaun foun lidera husi Xanana Gusmao sei responde hodi husu ba nia ema iha Governasaun rezigna, sei halo mosaun sensura hamonu Goveernu no halo demonstrasaun hasoru Presidente Republika.  

“Justu ka la justu ne’e problema politika governasaun ninian, Primeiru Ministru mak halo avaliasaun ba nia membru governu, koligasaun laiha buat ida pronunsia ba saida kona-ba prosesu demisaun nian,”Portavoz Koligasaun AMP foun, Antonio da Conceiçcão (Kalohan), ohin iha Parlamentu Nasionál.

Nia dehan, koligasaun foun laiha hanoin atu halo mosaun sensura, tanba Primeiru Ministru mós husu tiha demisaun, tanba ne'e atu halo mosaun sensura ba Primeiru Ministru nia pedidu ba Presidente Republika ne'e laiha fatin.

Nune’e mós nia akresenta, demonstrasaun ne’e halo iha tempu funu nian, laos tempu agora. Tempu agora fatin ba promove diálogu, tempu atu respeitu konstitusionál

“Ita nunka hanoin atu estadu ne’e atu promove ho dalan sira hanesan demonstrasaun dalan sira atu hatuun malu. Iha regras konstitusaun atu ita hotu-hotu tenta atu komprende hodi hala’o la presija demonstrasaun,”tenik nia.