Porta Vós Aliansa Maioria Parlamentár, António da Concencão hatete, AMP foun laiha politika ida atu konfrontu ho Governu atuál lidera husi Primeiru Ministru Taur Matan Ruak.

Tuir nia katak,  iha situasaun agora nasaun infrenta, oinsá hanoin hamutuk hodi kombate viruscorona.

Sekretariu Jerál Partidu Demokratiku ne’e haktuir, koligasaun foun iha loron rua enkontru iha rezidensia Prezidente Aliansa Maioria Parlamentár Xanana Gusmão ne’e ko’alia oinsa atu hamutuk ba partisipasaun povu nian kona-ba viruscorona ba aktu prevensaun nian.

“Ita labele hein governu deit mak hola medidas depois estadu emerjénsia par polisia sira tuun hotu mak foin trava populasaun hanoin senaria ida hamutuk oinsá atu prevene labele hadaet ba virus corona nian,”dehan nia, iha Parlamentu Nasionál segunda (06/04).

Koligasaun foun eziste ona, tanba ne’e atu kordena asaun sira atu kontribui nafatin ba estadu emerjénsia.

Tanba ne’e, nia rezeita informasaun ne’ebé duun koligasaun foun halo planu iha pontus haat atu hasoru governu.