Tuir komunikadu ne’ebé Online INDEPENDENTE asesu iha Pajina KAK, haktuir,  dirijente no staff SERVE, I.P. na’in lima (5), ekipa Investigasaun Kriminal KAK hamutuk ho PNSIK bolu obrigatóriu iha dadersan no na’in tolu (3) seluk iha oras lokraik.  

Dirijente no staff SERVE, I.P. na’in 8 oras ne’e assume kargu importante iha instituisaun estatal ne’e.

Objetivu husi asaun polisial ne’e atu Ekipa Investigasaun kriminal CAC nian halo identifikasaun no rekolla informasaun preliminaria ba sira durante oras balun nian laran, tuir Lei Kodigo Prosesu Penal Artigu 53.

Komisáriu KAK, Rui Pereira dos Santos esklarese ba publiku katak, Ekipa Servisu Informasaun Sekreta no Investigasaun Kriminal husi Komisaun Anti Korupsaun (CAC-sigla Portugués) hamutuk ho Polisia Nasional Servisu Investigasaun Kriminal (PNSIK), halo buska no bolu obrigatoriu dirijente SERVE, I.P. nian relasiona ho kazu balun ne’ebé KAK investiga hela, bazeia ba keixa no informasaun balun ne’ebé KAK rasik halibur iha terenu.

“Tanba ne’e KAK, ohin ba follow up ho asaun identifikasaun ba responsavel sira iha SERVE IP, labele rona deit husi públiku ho media sira, maibé ita (KAK) mós presija haklean investigasaun atu haree verdade husi alegasaun públiku nian ne’ebé viral iha media sosial no krimi balun akontese duni ga lae?,” dehan Komisáriu KAK, Rui Pereira iha Komunikadu ne’ebé Online ne’e sita.

Responsavél SERVE, I.P sira hanesan Diretor Ezekutivu, Adjunta Diretora Ezekutiva no funsionariu relevante sira ne’ebé iha lista, presta deklasaun iha KAK durante oras 12 nian laran tuir Kodigo Prosesu Penal.

Entretantu, dirijente na’in lima ho ninian staff sira iha SERVE, I.P kolabora diak ho asaun polisial nian, ne’ebé bolu sira obrigatoriu no bazeia ba lei Kodigu Prosesu Penal artigu 53.