Vise Prezidente Bankada FRETILIN Francisco Miranda Branco hatete, povu nia mensajen liu husi rezultadu eleisaun ne’ebé liu ona hatudu katak laiha partidu ne’ebé hetan maioria absoluta, signifika politiku-nain sira tenke buka oinsa atu tuur hamutuk.
Tan ne’e, kona-ba ukun, Branco dehan, la’os partidu FRETILIN nia ajenda.
“(kaer ukun) Ida ne’e interese grupu no partidu nian, ne’e ami la tau iha ami-nia ajenda, ami-nia ajenda mak see de’it mak atu ba ka’er ukun ne’e tenke rezolve povu-nia moris, la’os rezolve grupu no politiku sira-nia moris. Rezolve povu-nia moris mak iha ami-nia ajenda, labele tau fali estadu no povu hanesan interese grupu sira nian,” dehan Branco iha PN, foin lalais.
Ba situasaun atual, Branco hatete, kaer ukun la’os sai asuntu importante ba FRETILIN.
“Ami hatete bebeik ona (kaer ukun) ida ne’e la importante, importante mak ita rezolve impase ida ne’e, ida mak ba ka’er ukun mós hanesan nafatin, uluk sira hamutuk atu rezolve problema sira ne’e, maibé tuur hamutuk sira mak selok malu fali, hatun malu fali hodi haluha povu no estadu, ne’e labele, tanba problema internu iha sira-nia aliansa hodi hadaet ba OJE.”
Tan ne’e, tuir nia, konvite Prezidente Repúblika Francisco Guterres Lu Olo ba partidu politiku sira sai nu’udar oportunidade di’ak atu tuur hamutuk hodi buka dalan no bainhira kaer ukun karik tenke iha seriedade politika hodi respeitu povu-nia vontade.
“Povu-nia mehi mak ne’e duni, atu tuur hamutuk hodi rezolve povu no estadu nia problema, Ida ne’e mak povu nia ezijensia. Ida ne’e mak politika sira tenke intrepreta,” katak nia.
Kona-ba dialogu, Branco dehan, dezde uluk kedas FRETILIN nakloke ba dialogu. Tanba, maske iha diferensia opiniaun ba dezenvolvimentu nasionál, maibé kuandu trata nasaun no estadu nia moris hotu-hotu tenke ho vontade di’ak tuur hamutuk hodi koalia.
“Ami hein katak hotu-hotu hanoin hanesan, labele tau fali nia arogansia, ego, as liu fali povu nia ezijensia, tanba povu mak boot, tenke hakruk ba povu hodi rezolve sira-nia moris no estadu nia moris,” deklara Branco.
