Repetidor ka tore sira sei marka naran Heroi sira nian, ne'e hanesan momentu importante ida ba dezenvolvimentu hodi hadia povu nia moris no hadia rai ne'e.
Primeiru-Ministru, Kay Rala Xanana Gusmão esplika, razaun fundamentál dedikasaun naran erói no eroina sira bá repetidór iha Kabu Submarinu, hodi fó hanoin bá ukun na’in sira atu serví nasaun no povu ho loloos, tau aas liu interese povu nian, no haluha tiha interese pessoál. PM esplika iha ámbitu serimónia dedikasaun naran erói sira bá repetidór no Branching Unit iha Kabu Submarinu bazeia bá Desizaun Konsellu Ministru (KM).
“Momentu importante ida bá dezenvolvimentu. Karik sira na’in 200.000 resin la mate iha funu laran, ita kala la hetan ukun aan ne’e. Ne’e duni, bainhira ita dedika, tau sira nia naran iha repetidór sira bá kabu submarinu ne’e, ita hotu hakarak rekoñese sira nia sakrifísiu, hamutuk ho sakrifísiu povu tomak nian mak ita bele hala’o knaar bo’ot hodi hadi’a povu nia moris, hadi’a rai ida ne’e ninia dezenvolvimentu,” dehan nia, iha Portu Dili, Sábadu (22/6).
Xanana temi erói ida-idak mak hanesan Repetidór no. R4101 atribui bá eroina Maria Udu Bere “Maria Tapo” nu’udár feto timoroan ne’ebé kaer kilat hodi tiru hasoru inimigu. Repetidór no. R4102 atribui bá eroina Rosa Bonaparte Soares “Muki” nu’udár joven feto ida ne’ebé iha 07 Dezembru 1975, hamutuk ho Francisco Borja da Costa ho sira seluk, inimigu óho iha Portu Díli ne’e.
Repetidór no. R4103 atribui bá eroina Dulce Maria da Cruz “We-We”, hanesan feto matenek ida no espoza hosi saudozu Sahe. Repetidór no. R4104 atribui ba eroi Fernando de Araújo “Lasama” ne’ebé mate iha tempu ukun aan.
Branching Unit, atribui bá erói saudozu Agustinho do Espiríto Santo hanesan komandante boot, ne’ebé iha kbiit Komanda iha Fronteira Súl. Iha Suai nia hadau inimigu nia kilat barak tebes, maibé tanba lakohi kumu-liman maka FRETILIN haruka oho tiha nia, tenke rekoñese katak nia nu’udár komandante ida ne’ebé di’ak tebes.
Repetidór no. R4301, atribui bá erói José da Silva hanesan sarjentu ida ne’ebé maka iha Aileu, bainhira atu halo insureisaun armada iha Aisirimou hodi dehan kria FALINTIL, maibé mós tanba lakohi kumu liman maka FRETILIN oho tiha. Nu’udár timoroan tenke rekoñese sira-nia hahalok.
Repetidór no. R4302 atribui bá erói Venâncio Ramos Amaral Ferras, nu’udár komandante ida Ainaro oan. Depoiz de kampaña tinan 1997-1998, inimigu harahun tiha baze apoiu, membru Komité Sentrál FRETILIN (CCF) barak oho tiha sira, balun mai rende ikus mai sai hotu erói no balun sei moris. Iha tinan 1990, ema oitoan de’it mak iha Ponta Leste buka atu re-organiza, Xanana la’o de’it hale’u Timor no komandante Ferras mak kaer hela Pelutaun rua iha Ainaro ho tán komandante ida iha Same hodi la’o hamutuk ho Komandante em Xefe, la liu ema na’in 500 hodi kontinua funu.
Reprtidór no. R4303, Saudozu Denis Carvalho da Silva komandante ida mós hosi Lautém, nia mós komandante di’ak tebtebes kontinua funu.
"La’o ho ami mai to’o iha ai-laran, ho sira nia hahalok sira ne’e maka ita tau iha repetidores, nune’e liu husi sira ita hakarak lembra mártire sira no erói hotu-hotu, no populasaun tomak ne’ebé mate iha funu. laran, hodi fó hanoin mai ita bainhira ita kaer knaar ruma atu servi idak-idak haluha tiha nia Ana, haluha tiha grupu, família hodi servi rai ho povu ida ne’e ho di’ak,” tenik nia.
Iha fatin hanesan, Ministru Transporte no Komunikasaun (MTK), Miguel Marques Gonçalves Manetelu, lori Steering Committee ba Infraestrutura Kabu Submarinu no grupu traballu nia naran, hato’o boas vindas bá membru Governu sira ne’ebé prezenta iha serimónia solene “Dedikasaun Naran” Eroi no martír sira ba repetidór sira ne’ebé halo parte, bá kabu submarinu nian.
Iha Okaziaun ne’e Ministru dehan, la’ós de’it nu’udár eventu importante ida ba dezenvolvimentu teknolojia no modernizasaun rede telekomunikasaun Timor-Leste nian, maibé mós nu’udár rekoñesimentu ida bá erói sira nia aten brani, dedikasaun no sakrifísiu, ba paíz ne’e nia independénsia no bá Dezenvolvimentu aban bainrua nian.
Konserteza, tanba repetidór ida ne’e limitadu no iha de’it 8, maka husu deskulpa bá erói no mártir sira hotu, tanba sei labele tau hotu sira nia naran. Iha duni espíritu ida ne’e mak Governu hakarak rekoñese no hili husi sira nia leet, komandante, funu na’in no aswain sira ne’ebé reprezenta liu rihun atus rua ne’ebé fó sira nia vida ba rai ne’e nia independénsia. Entre sira na’in 8, iha eroina na’in 3 ne’ebé sira nia naran dedika mós bá repetidór sira ne’e.
“Bá família erói sira hotu ne’ebé marka prezensa ka karik la konsege marka prezensa hotu, ami nia hakruuk no orgullu bá sira hotu,” tenik Ministru.
